ШҮТЭН БИШРЭГЧДИЙНХ НЬ ХУВЬД ЭНЭ АСУУЛТ ҮЙМЭЭН ДЭГДЭЭХЭД ХАНГАЛТТАЙ ШАЛТАГ БОЛЖ ЧАДНА

Дээрх асуултын хариу хэн нь түрүүлж дэлхийн аварга болсноор гарах байсан. Хөл бөмбөгийн түүхэн дэх энэхүү хоёр агуу тоглогчийг амжилт үзүүлж эхэлснээс нь хойш фанатууд нь харьцуулж, хэн нь илүүг шалгаруулах туйлын хүслэн болсоор ирсэн билээ.

Зар сурталчилгаа, цахим орчин, тамхи татах цэг, хогийн цэг гэх зүйлс дээр үргэлж тэдний харьцуулсан санал асуулга хөл бөмбөгийн хорхойтнуудаас авдаг. Бүр хэн нь илүүг шалгаруулах гэж маргалдсан найзууд нэгнийхээ аминд хүрч дууссан тохиолдол ч бий. Дээрх шилдэг тоглогчид дэлхийн шилдэг хөл бөмбөгч шалгаруулах “Алтан бөмбөг”-ийн шагналаас эхлээд Испанийн “Ла Лиг”-ийн цом, “Европа лиг”-ийн цом, “Аваргуудын лиг”-ийн цом, “Супер” цомын эзэд болж байсан боловчиг ганц ч удаа дэлхийн аваргын цомыг өргөж байгаагүй юм.

    Тухайн спортын хувьд бусад спортоос ялгаатай нь хөл бөмбөгийн ДАШТ нь Олимпын наадмын төрлөөсөө илүүд тооцогддог. ДАШТ-ий тэргүүн багийг шагнадаг “Алтан дагина” цомыг хүртэх нь бүхий л хөл бөмбөгчийн мөрөөдөл гэхэд хилсдэхгүй. Энэ төрлийн олимпын наадамд улсууд ихэвчлэн залуучуудын шигшээ багаараа оролцдог бол “Алтан дагина”-ы төлөөх уралдаанд супер од, сэлгээний сандал халаагч хэн ч байсан шигшээ баг нь дуудсан л бол оролцохгүй байна гэж үгүй. Магадгүй энэ нь хөл бөмбөгчдийн хувьд хөл бөмбөг тоглосны гавьяа болов уу.

Хөл бөмбөгийн түүхэн дэх энэхүү хоёр агуу тоглогчийг амжилт үзүүлж эхэлснээс нь хойш фанатууд нь харьцуулж, хэн нь илүүг шалгаруулах туйлын хүслэн болсоор ирсэн билээ

    Лионель Месси болон Кристиано Роналду нарын үзүүлсэн амжилт, хийсэн гоолын тоо тийм ч хол зөрүүгүй. Спортын тоймч, судлаач, үзэгчдийн тэдний хамгийн шилдэг нь хэн болохыг харах эцсийн найдвар нь 2018 оны ДАШТ дээр замхран алга болсон. Тэдний хэн нь ч “Алтан дагина”-ыг өргөх тавилангүй байжээ. Хувийн карьертаа ямагт шилдэг нь байсан тэдний хувьд ДАШТ-ий тоглолтууд хүнд, хэцүү даваа лугаа санагддаг байж болох юм. Португалийн шигшээ багийн тоглогч Роналдугийн багийн хамтрагчид төдийлөн сайн байж чаддаггүй ч сүүлийн жилүүдэд шигшээ багийн чансаа үзүүлэлт сайжирч, ахиц хөгжил гарсан ч өнгөрсөн ДАШТ-ий “Хар морьд”-ын нэг байгаагүй. Мессигээр удирдуулсан Аргентиний шигшээ баг ч төдийлөн сайн тоглоогүй юм. Тэрбээр 2014 оны ДАШТ-ий финалд хүрсэн ч аваргын төлөө Германы шигшээ багт 1-0 харьцаагаар хожигдсон. 2022 оны ДАШТ-ийг хүлээсэн ч нэг нь 38 нөгөө нь 36 настай байна. Уг нас нь энэ төрлийн спортын тамирчны хувьд оргил үеэ өнгөрөөсөн буюу шилдэг тоглолтоо үзүүлж чадахгүй, бэртэл гэмтэлд өртөх эрсдэлтэй. Мөн Аргентиний шигшээ багийн ахлагч асан Лионель Месси шигшээ багаасаа хэдий нь зодог тайлсан. Тийм учраас ч тэдний фанатуудын хүсэн хүлээсэн мөч ирэхгүй.

Тэдний хэн нь ч “Алтан дагина”-ыг өргөх тавилангүй байжээ

    Харин Испанийн алдарт “Ла лиг”-ийн хүчирхэг хоёр багт нэрээ дуурсгасан хоёр тоглогчоос зөвхөн Месси л “Ла лиг”-ээс өөр дээд лигт тоглоогүй юм. Роналдугийн хувьд эзэн хааны Реал Мадрид багтай гэрээгээ үзэглэхээсээ өмнө, “Английн премьер лиг”-ийн Манчестер Юнатед” багт тоглож, мөн 2018 оноос Италийн “Ювентус” багт тоглож буй нь Мессигээс нэг алхам илүү алхахад хүргэсэн гэж болно. Хөл бөмбөг сонирхогчдын хувьд “Ла лиг” гэх зэрэг хэдхэн баг ноёлдог лигээс илүүтэй жил бүр үзэгчдийн сонирхлыг татсан тэмцэл үзүүлдэг “Английн премьер лиг”-ийг илүүд үздэг. Энэ талаар Роналдуг Мессигээс илүү хэмээх нь ч бий. Гэвч тэдний 2007 оноос хойш дэлхийн шилдэг хөл бөмбөгч шалгаруулах “Алтан бөмбөг”-ийн шагналыг ээлж дараалан авч байсан нь хоёр жилийн өмнө зогсож, шигшээ багаа ДАШТ-ий мөнгөн медальд хүргэсэн Хорватын тамирчин Лука Модрич “Алтан бөмбөг”-ийг хүртэж, өнөө хоёрыг далаар нь тавьсан юм даа.

        Гэлээ ч Лионель Месси өнгөрсөн жил зургаа дахь “Алтан бөмбөг”-ийн эзнээр шалгарснаар Роналдугаас “Алтан бөмбөг”-өөрөө нэгээр илүү болсон нь түүнийг нөгөөгөөсөө нэг алхамын илүүд хүргэсэн. Ийм байдлаар тэдний фанатуудын харьцуулалт нэг нэгэндээ мөчөөгүй өгөхгүй үргэлжлэх юм. Харин “Тэдний хэн нь дэлхийн хамгийн шилдэг хөл бөмбөгч вэ” хэмээн өдгөө 80 насыг зооглож буй Бразилийн домогт хөл бөмбөгч Пелегээс асуухад “Би хувьдаа Роналдуг Мессигээс илүү гэж боддог. Гэхдээ тэдний хэн нь ч надтай харьцуулагдашгүй. Би хамгийн шилдэг нь” хэмээжээ. Хөл бөмбөг сонирхогчдын дундах хоёр арван дамжин үргэлжилж буй энэ харьцуулалт цаашид хэзээ хүртэл үргэлжлэхийг бид үл мэднэ. Эцсийн дүгнэлтэд тэдний хэн нь илүүг олж чадаагүй ч Пеле тэднээс илүү гэдгийг мэдлээ шүү дээ.