XXI зууны хөгжил, дэвшилтэй дэлхийн өнцөг булан бүрээс хөл нийлүүлэх боломжтой цаг үед бид амьдарч байна. Өнөөгийн хүн төрөлхтний өдөр тутмын амьдралыг гар утас, компьютер зэрэг ухаалаг төрөөхөмжгүйгээр төсөөлөх аргагүй. Гэвч ухаалаг төхөөрөмжийн хэрэглээ өргөн тархсантай зэрэгцэн цахим сүлжээн дэх гэмт хэргийн тохиолдол ихэссэн. Хэрэглэгч хувийн мэдээллээ алдаж, цаашилбал гэмт хэргийн хохирогч болох эрсдэлтэй. Мөн зарим хэрэглэгч ашиглаж буй программыг хэрэглэх явцад гарч ирдэг зар сурталчилгаанд бухимдалтай байдаг. Тийм ч учраас тэдгээр хэрэглэгчид өөрт тохирох хамгийн тустай программыг хүсдэг. “Эргэлт.мн” сайтаас энд онд дэлгэрээд буй ашиглахад хялбар, таны хувийн мэдээллийг хамгаалж, таны өдөр тутмын амьдрал хэрэг болж чадахуйц шилдэг программуудыг танилцуулж байна.

Adobe Photoshop Express

Дарсан зарим зургаа “янзлахгүй” л бол болохооргүй санагддаг үе бий. Компьютер дээрх “Photoshop CS” программыг ашиглахад хэцүү, хүндрэлтэй байдаг талаар олон хэрэглэгч шүүмлэлтэй ханддаг. Харин энэ удаад хэрэглэгч ганц товчлуур дараад л зургийн тохиргоогоо автоматаар хийх боломжтой. Хэрэв “Adobe photoshop express”-ийн автомат тохиргоо танд таалагдахгүй бол хэрэглэгч өөрт таалагдахаар засах боломжтой бөгөөд тохиргооны цэсүүдийг ашиглахад илүү хялбар болгосноороо онцлогтой. Уг программыг зөвхөн компьютер дээр бус ухаалаг гар утсандаа татан ашиглаж болох юм.

ExpressVPN

Монгол Улсаас зарим гаднын орны веб рүү хандах боломжгүй, хаалттай байдаг. Дараагийн танилцуулж буй апп маань тухайн асуудлыг шийдэх болно. Гаднын сайтуудын хаалтыг арилгах зориулалттай бусад аппыг ашиглахад үр дүн нь ижил боловч тус сайтад хандах интернэт хурдыг бууруулдаг. Харин “ExpressVPN” нь ямарваа интернэтийн хурд бууруулахгүй, басхүү 94 орны 160 серверийг ашиглах боломжтойгоороо бусад төхөөрөмжөөс илүү үнэлгээ авсан билээ.

Enpass Password Manager

Цахим сүлжээнийхээ нууц дугаарыг алдаж байгаа юм биш биз. Тийм бол уг программыг ашиглахыг зөвлөж байна. Ямарваа нэгэн веб хөтөч ашиглахдаа нууц дугаараа хадгалах, дахин нэвтрэхэд хялбар болгохоор сануулж, нууц дугаараа хадгалдаг. Харин тухайн нууц дугаарыг дурын этгээд ашиглаж болох бөгөөд та хувийн болон банк, санхүүгийн мэдээллүүдээ алдах боломжтой. Дээрх программыг ашигласнаар бүхий л нууц дугаараа хаанаас ч хянах боломжтой. Интернэтгүй үед ч болох юм. Харин уг программыг ашиглаж байх явцад таны нууц дугаар алдагдсан тохиолдолд “Sinew” программ хангамжийн компани хариуцлагыг хүлээх гэнэ.

myTube

Ердөө нэг ам.доллар ашиглан “Youtube” дээрх бүх төрлийн видео бичлэгийг хэзээ ч, хаана ч, интернэтгүй үед ч үзэх боломжтой. Ихэвчлэн “iPhone” маркын гар утастай иргэдэд тустай болж байгаа гэнэ. Нэг долларын төлбөр төлөхгүй, үнэгүй ашиглаж болох ч үнэгүй ашиглаж буй хэрэглэгч, төлбөртэй хэрэглэгчээс өөр системээр ашиглах юм. Жишээлбэл, үнэгүй ашиглахад гурван цагийн бичлэгийн нэг цаг тутамд видео зогсож, 10 минутын завсарлагатайгаар үргэлжилнэ. “Энэ нь хэрэглэгчийн төлбөрийн асуудал болон дэлгэцийн хэт ягаан туяанаас хамгаалах зорилготой. Цаашид үүнээс ч илүү хөгжүүлэх зорилттой ажиллаж байна” хэмээн тус программыг хөгжүүлэгч Кристофер Блэкман мэдээлжээ.

NOVA Launcher

Хэрэглэж буй ухаалаг гар утаснаасаа уйдаж буй хэрэглэгчдэд тохиромжтой. Нэгэн хэвийн өнгө, хийц, хэрэглүүрүүдийг харсаар залхаж, шинэ гар утас авах иргэд олширсон. Хэрэв таны гар утасны доторх тал үзэмжгүй санагдаж байвал өөрт тохирох өнгө, дүрс бүхий цэсийг уг программыг ашигласнаар сонгох юм. Хэрэглүүрийн өнгө, дүрс, функцыг өөрчилж, туршиж үзвэл хуучин гар утсаа барьж байгаа юм шиг санагдахгүй хэмээн найдаж байна.