Сошиал сувгуудаар “Бидний дунд” нэртэй тоглоом ихээхэн алдаршиж буй билээ. Уг тоглоомын эхний хувилбарыг хоёр жилийн өмнө “InnerSloth” сайтаас ухаалаг гар утастай хэрэглэгчдэд зориулан гаргасан юм. Тоглоомын тухайд сансрын хөлөгт 10 болон түүнээс доош тооны тоглогч байх бөгөөд тэдний 1-3 нь зүсээ хувиргасан этгээд байна. Тоглоомын дүрэм нь зүсээ хувиргагчдыг олох. “Бидний дунд” тоглоомыг сансрын хөлөг, томоохон хэмжээний байгууламж болон гариг дээрх бааз гэсэн гурван байршилд тоглох боломжтой. Тоглогчид нэгнээ жинхэнэ, эсвэл хуурамч гэдгийг мэдэхгүй.

Нисгэгчид даалгавраа биелүүлж, зүсээ хувиргасан нь хэн нэгнийг хөнөөж, хорлон сүйтгэнэ. Тоглогчдоос яаралтай цугларалт болон цогцос харсан мэдэгдэл хийж нэгэнтэйгээ уулзаж, зөвлөлдөн хэн нэгнийг хөлгөөс хаях шийдвэр гаргах ёстой. Хөлгөөс хаягдах нь хоёр тоглогчийн аль нь ч байж болно. Үхсэн тоглогч сүнс болох ба бусад тоглогч түүнийг харахгүй ч тэр даалгавраа биелүүлнэ. Тоглоомонд цаанаас өгсөн даалгаврыг нисгэгчдийн баг дуусгаж чадвал зүсээ хувиргагчийг олохоосоо өмнө хожих боломжтой юм.

Тоглоомынхоо тухайд, үүсгэн байгуулагчдын нэг болох Маркус Бромандер “Бидний бага насны хайч, чулуу, даавуу тоглож байсан үе нэгэнт өнгөрчээ. “Бидний дунд” тоглоом тоглогчдыг хөгжилтэй байлгаж чадах болов уу гэж найдаж байна” хэмээн мэдэгдэж байжээ.
“Бидний дунд” тоглоомын хоёрдугаар хувилбарын дизайныг хийж эхлээд байгаа бөгөөд серверийн гацалт, алдаануудыг засан хөгжүүлэлт хийх, тоглогчдын өнгөний сонголтыг нэмэх, хэрэглэгчийн хаяг үүсгэж, найзын цэстэй болгон, шинэ үетэй байхаар зохион бүтээжээ. Мөн зар сурталчилгааны хэсгийг хасахгүй, хөрөнгө оруулалтаа түүнээс олж байгаагаа “InnerSloth” сайтын удирдлагууд мэдээлээд байгаа юм.