Монгол ард түмний зүрх, сэтгэлийг хөг аялгуугаар уярааж, долгисуулж чаддаг хүн бол Нацагийн Жанцанноров. Түүнийг их сургуулиа төгсөөд удаагүй байхад аав нь бурхны оронд оджээ. Аавыгаа нутаглуулчихаад ах Н.Гончигтойгоо малын хашаа барьж байхдаа аялгуу хийх анхных нь санаа сэтгэлд нь бууж, түүнийг нь Д.Банзрагч гуай Сүхбаатарын талбайд дуулснаар эргэлт, буцалтгүй хөгжмийн ертөнц рүү орж, сонсогчдынхоо зүрх сэтгэлийг уярааж, уяруулж яваа эрхэм. Энгийн, эгэл ээж, ааваас хосгүй авьяастай төрсөн тэрбээр Монгол Улсын Консерваторын "ПРОФЕССОР" цол хүртсэнд Эргэлт.мн мэдээллийн сайтын уншигчдынхаа өмнөөс халуун баяр хүргэе.

Тэр бол дахин давтагдашгүй хөг аялгууг бүтээсэн монгол түмний хайртай хүү

Н.Жанцанноров гуайн сэтгэл зүрх, оюун ухаанаар бүтээгдсэн аялгуунаас эх орон, онгон дагшин байгаль, шашинлаг үзэл мэдрэгдэхээс гадна цаанаа л нэг амин сүнстэй байдаг. Түүнээс биш ямар нэгэн чамирхал, ганган тансаг дуугаралт үгүй. Харин аядуу намуухан эгшгээр хүний сэтгэл, зүрхийг долгисуулж, зөөлрүүлж чадах увдис чанартайг сонсогчид нь андахгүй биз ээ. Тэр бол хүний дотоод сэтгэлийн гоо сайхныг хөгжмөөр илэрхийлэгч юм. Тиймдээ ч аялгуу бүхэн нь амин сүнстэй байдаг.  Төрж өссөн нутаг Арвайхээрийнхээ талаар олон сайхан дуу хийж, дуунд төрсөн нутгаа мөнхөлсөн нэгэн. Одоо ч, цаашдаа ч  түүний аялгуу бүхэн нутгийнх нь зөөлөн салхи шиг сэвэлзэж, тоглож өссөн Зэгстэй  голын ус шиг цалиглаж, Сангийн далайд хун чуулсан мэт зон олон дуулсаар л байна. Тэр бол дахин давтагдашгүй хөг аялгууг бүтээсэн монгол түмний хайртай хүү. Ур ухаан, авьяас билгээ хослуулж, мөнх тэнгэрийн доор мөнхийн аялгууг бүтээж яваа авьяас билэгт уран бүтээлч билээ.

Ур ухаан, авьяас билгээ хослуулж, мөнх тэнгэрийн доор мөнхийн аялгууг бүтээж яваа авьяас билэгт уран бүтээлч билээ.