2018 онд анхны цомог болох “Fallen City” цомгоо гаргаснаас хойш гаднын орнуудын томоохон хөгжмийн наадмуудад оролцож, Монгол Улсын металл хөгжмийн гол төлөөлөгчдийн нэг болоод буй Growl of Clown хамтлагийн гоцлол дуучин Б.Хүрэлбаатартай ярилцлаа.

-Анх хэзээнээс хөгжимд дуртай болж, уран бүтээл хийж эхэлсэн бэ?
-Мэдээ орсон цагаасаа хойш урлагийн хүн байлаа. “Маамуу нааш ир” дуунаас эхлээд хүн бүр мэдээ орсноосоо хойш дуу хөгжимд дуртай болж, дурладаг болов уу гэж боддог. Харин 2011 оноос металл хөгжимд шимтсэн. 2014 оноос хамтлаг байгуулж, өнөөг хүртэл уран бүтээл хийж явна даа.

-Энэ жил уран бүтээлийн олз омог хэр их байна вэ?
-Хоёр дахь цомгийнхоо ажилд орсон. Сайн цомог болно гэсэн итгэлтэй байна. Тайландад хийлгэж байгаа таван дуунаас бүрдсэн “Салбадай” нэртэй цомог бий. Энэ цомгоороо гэр бүлийн хүчирхийлэл, ялгаварлан гадуурхал, нийгэм тал руугаа хандсан. Цомгийн хувьд бараг л бэлэн болсон байгаа.

-Цомгийнхоо нээлтийг төлөвлөсөн үү?
-Цомгийн нээлтийг амьд хөгжмийн олон хамтлаг нийлж хийдэг. Харин энэ удаад бид зөвхөн өөрсдөө тоглоно. Ямар ч тасалбар худалдахгүй. Зөвхөн урилга тарааж, урилгаар ирсэн хүмүүстээ зориулсан, хаалттай нээлт, тоглолт болно. Нээлтэд урилгаар ирэх хүмүүс зөвхөн сууж үзэх ёстой. Уг цомгоосоо 100 ширхгийг хэвлүүлнэ, дахиж хэвлүүлэхгүй. 

-Сошиалд их идэвхтэй, мөн хоол хийх дуртай хүн шиг санагдсан?
-Нэг их идэвхтэй байя гэж боддоггүй шүү. Хаа нэг зав гарахаар юм бичиж оруулдаг. Хоол хийх тал дээр гэвэл хобби юм уу даа. 

-Сонсогчид таныг тайзан дээрх дүр төрхөөр тань төсөөлдөг. Амьдрал дээрх Б.Хүрэлбаатар ямар хүн бэ?
-Тайзан дээр гараад тэгнэ, ингэнэ гэж нэг их хичээгээд байдаггүй. Ямар нэг зүйлээрээ хүмүүсийн анхаарлыг татъя, таалагдъя гэж боддоггүй. Тайзан дээр гарахаар цаанаасаа л өөр юманд автсан юм шиг байдаг. Хүмүүс “Чиний хаанаас чинь тийм хоолой гардаг юм бэ” гэж их олон асуудаг. Ганцаараа байх, найзуудтайгаа уулзах, тайзан дээр гарах гээд бүгд өөр байх ч бүгдэд нь өөрийнхөөрөө байж чаддаг.

Найзуудтайгаа уулзаж, хоол хийж идэх, ганц хоёр шар айраг ууж, маазарч суунгаа ирээдүй болон өнгөрснөө ярьж суух дуртай. Гэхдээ сүүлийн үед их дуугүй, нам гүм байх дуртай болоод байна. Эхнэртэй болсон, удахгүй аав болох гэж байгаа. Ямартай ч хүүхдээ төрөхөөс өмнө хоёр дахь цомгоо гаргана.

-Гэр бүлийнхээ талаар?
-Дээрээ нэг ахтай, эхээс хоёулаа. Аав минь өнгөрсөн жил өөд болсон. Одоо ээж, ах, ахынхаа гэр бүл, эхнэртэйгээ гээд өнөр өтгөн амьдарч байгаа.

-Металл хөгжим бусдаасаа онцлогтой. Зарим хүн энэ тал дээр их буруу ойлголттой байдаг?
-Тэр ойлголтыг нь засъя гэж ерөөсөө боддоггүй. Ойлгохыг хүссэн нь ойлгоод явахад л болно. Анх хүмүүсийн металл бол хүнд, ойлгомжгүй гэх мэт ярианууд нь их төвөгтэй санагддаг байсан. Одоо бол энэ талаар бодох завгүй юмаа л хийж, дэлхийн хамтлаг болохоор зорьж байгаа. Таван жилийн ойн тоглолтоосоо өмнө БНСУ-ын хөгжмийн фестивальд оролцоод ирсэн.

Түүний дараа Англи, Хятад зэрэг орны томоохон хөгжмийн наадмаас урилга авсан. Коронавирусийн цар тахал гараад бүгд хойшилсон байгаа. Харин энэ хугацааг зүгээр сууж алдахгүйн тулд чадваруудаа илүү сайжруулж, хоёр дахь цомгоо ч хийгээд авъя гээд сэтгэл шулуудсан.

-Уран бүтээлээрээ дэлхийн хамтлаг болох зорилготой. Хувь хүнийхээ талаас таны зорилго, зорилт юу вэ?
- Хүн бүр л тодорхой хэмжээний их бага зорилготой амьдардаг шүү дээ. Хамгийн том зорилго маань дэлхийд уран бүтээлээрээ гарах. Би “Мөнгө олох гэж биш, амьдрах гэж уран бүтээл хийдэг”. Бусад жижиг сажиг зорилго, зорилтоо яриад байвал дуусахгүй болов уу. Ямартай ч энэ ондоо багтааж, цомгоо гаргаад дараа нь нэг хэсэг тайван амьдаръя гэж бодож байна даа. Тэр хугацаандаа сайн аав, сайн нөхөр байхыг хичээнэ.

-Монгол Улс дахь “Монгол” гэх тодотголтой дуу хөгжмийн талаарх таны бодол?
-Зохиолын дуунууд сүүлийн үед их хөгжиж байна. Ямар ч ноот мэдэхгүй дуучид МУСТА цол аваад л, үнэхээр сайн хөгжиж байгаа. 60, 70, 80-аад оны гоё дуунууд бий. Би ч тэдгээр дуунд дуртай. Төрөл бүрийн дуу сонсдог. Одоо хийж байгаа маш муу дуунуудаа болих, зогсоох хэрэгтэй.

Нутаг, усаа магтан дуулж байгаа нь сайхан хэрэг. Гэхдээ 21 аймгаараа аялан тоглолт хийгээд, сонсогчдынхоо хамаг мөнгийг нь сааж, нутаг усыг нь магтаж, бүгдийг нь хөөрүүлж, архидуулж орхичихоод яваад өгдөг шиг санагддаг. Ойлгох нь ойлгох л байх. Урлагаар хүнийг, нийгмийг хөгжүүлж, соёлжуулах ёстой.  

Үүнийг хүмүүс ойлгохгүй байна. Уулан дээр дээл өмсөөд, морь унасан байдалтай гээд л яг нэг хэвэндээ. Өөр юм хийж чаддаггүй. Хүмүүс К-Поп төрөлд дургүй байдаг. Үнэн хэрэгтээ К-Поп урсгал нийгэмдээ биеэ авч явах соёлоос эхлээд маш том соёл өгч байгаа. Бид тайзан дээр гараад уран бүтээлээ чөлөөтэй гаргаж байхад өөр ямар нэг урсгалын хөгжим сонсдог хүн хараад “Энэ ёстой бүтэхгүй” гэх мэт байдлаар шүүмжилж, шууд л хар тамхитай холбож ярьдаг. Үнэндээ тийм биш шүү дээ. Бид хөгжмийг арай дээд түвшинд аваачих гэж хичээдэг. Харин манай зохиолын дуучид хэдхэн ноотыг энд тэнд нь оруулж ая хийгээд, өнөө л нэгэн сэдвээ дуулдаг. Хип хопууд ч нэг их ялгаагүй л болов уу. Гэхдээ би энэ бүгдийг үгүйсгээгүй илүү сэтгэж, нийгэмдээ хэрэгтэй байх ёстой гэдэг үүднээс л хэллээ.

- Ярилцсанд баярлалаа.
-Баярлалаа.