“Жокер”-ын дүрээрээ кино урлаг сонирхогчдын анхаарлыг татсан жүжигчин Хоакин Феникс 1974 оны энэ өдөр Пуэрто-Рикогийн Сан Хуан хотод мэндэлжээ. Тэрбээр бага ахуй насандаа л өөрийн ах Ривер Фениксын хамтаар хэд хэдэн телевизийн цувралд дүр бүтээсэн юм. 2000 онд дэлгэцийн бүтээл болсон “Гладиатор” киноны Коммодусын дүрээр анх үзэгчдэд танил болсон байна. Тэрбээр жүжиглэхийнхээ хажуугаар кино зохиол бичиж, дуу хөгжмийн студийн продюсер, реп хөгжим ч бүтээж явсан удаатай. Жүжигчний ажлаа орхиж, реппер болохоор зорьсон өөрийнхөө амьдралын тухайгаа кино зохиол болгон бичиж, найруулж, өөрөө гол дүрд нь тоглосноор 2010 онд “I’m still here” нэртэйгээр дэлгэцийн бүтээл болгожээ. Зарим судлаач, нийтлэгч уг киног “Философийн сэдэлтэй бүтээл болсон” хэмээн сайшаах нь бий. Өнгөрсөн жил нээлтээ хийсэн “Жокер”-ын дүрд тоглохын тулд 23кг жин хассан нь түүнийг ямар сэтгэл зүрхээрээ ажилладаг, хүчтэй жүжигчин гэдгийг нь харуулсан болов уу. Уг дүрээрээ “Оскар”-ын шагнал, Лондоны кино наадмын шагнал, “Алтан бөмбөрцөг”-ийн шагналын эзэн болоод байгаа билээ.