Хамаг л болж бүтэхгүй, сөрөг зүйлсээр өөрийгөө дүүргэсэн уг анимэн мөн чанарыг мэдэхийн тулд уншигч та бүгдэд заавал үзэх ёстой хэмээн зөвлөх байна.

Японы зохиолч Жорж Абэ нь бүх амьдралынхаа туршид ганцхан зохиол бичсэн нь түүний төсөөлөмгүй алдар нэрд хүргэжээ. Түүний 2002 оноос цувралаар хэвлүүлсэн “Солонго” гэх бүтээл нь дэлхийн II дайны дараах Японы хар бараан амьдралын талаарх бүтээл юм. Нагасаки болон Хирошима хотуудад цөмийн бөмбөг хаяснаас таван жилийн дараа буюу 1950 он. Дайн болон бөмбөгдөлтөөс үүдэн эцэг эхээ алдсан хүүхдүүд өөрсдийн амьдралаа авч үлдэхээр хулгай, дээрэм хийж амьдралаа зогоох аж. Харин зохиол дээрх хамгийн онцлох газар нь “Хүүхдийн засан хүмүүжүүлэх газар”.

Гол дүрүүдийн нэг болох Ёкосука Жо нь бусад засан хүмүүжүүлэх газар хүргэхээр ачсан хүүхдүүдийн хамт хорих газрыг чиглэх автобусанд явж байгаагаар зохиол эхэлдэг. Үүгээр эхэлсэн гол дүрүүдийн адал явдал нь үнэнч нөхөрлөл, итгэлцэл, хагацал шаналлыг давж туулах ёстой болно. Хорих газрын харгалзагчдын хууль бус тамлал, яргалал хийгээд засан хүмүүжүүлэх газрын даргын бага насны хөвгүүдтэй харилцах бэлгийн гаж сонирхол зэрэг олон муу зүйлийг тэд даван туулахыг хичээнэ. Автобусанд хамт явж, зүс таних төдий болсон залуус засан хүмүүжүүлэх газрын нэг өрөөнд байхаар болоход хуваарилсан өрөөнд нь тэднийг Сакүраги гэх залуу хүлээж байв.

Тэрбээр тэднээс хэдэн насаар ах байсан нь тэдэнд “Эхлээд хүн шиг бай” гэж сургахад хүргэнэ. Сакүраги нь хорих газрын дарга болон харгалзагч нарын булай, гэм бурууг мэдэх бөгөөд түүнийг илчлэх баримт нотолгоо ч бий. Удалгүй Сакүраги засан хүмүүжүүлэх газраас суллагдах байсан ч газрын дарга болон харгалзагч нар түүнийг суллах нь бүү хэл амьд үлдээхгүй байх арга замыг сонгоно. Сакүраги болон түүний нөхөд албадан ажил эрхлэлтийнхээ зайгаар нэгэн өндөр ургасан мод олон, түүндээ өөрсдийн хүслээ бичиж үлдээх аж. Үүний дараа тэдний амь тэмцсэн, амиа хамгаалж үлдэх сүүлийн тулаан эхэлнэ.

Олон жилийн дараа тэдний цөөнх нь хүслээ бичиж орхисон өнөөх модон дээрээ очиж хүслээ биелүүлсэн эсэх тухай ярилцана. Заримынх нь хүсэл биелээгүй, хэзээ ч биелэхгүй нь тэд нар бүү хэл уншигчдад ч үнэхээрийн гунигтай байсан болов уу. Хар бараан амьдралыг харуулах ч уг зохиол судлаачдаас асар өндөр үнэлгээ аваад буй. Тэдний амьдралын төлөөх тэмцэл, нөхөрлөлийг тэднээс өөр хэн ч мэдэлгүй дуусна. Бидний нийгмийн хамаг л болж бүтэхгүй, сөрөг зүйлсээр өөрийгөө дүүргэсэн уг анимэн мөн чанарыг мэдэхийн тулд уншигч та бүгдэд заавал үзэх ёстой хэмээн зөвлөх байна.