УИХ-ын ээлжит сонгуульд дүнгээ тавьсан иргэд сар гаруйхны  дараа ИТХ-ын төлөөлөгчдөө сонгоно. Засаг захиргааны анхан шатны нэгж байгууллага хийгээд иргэдтэй хамгийн ойр ажиллаж, тэдний нийтлэг асуудлыг шийдвэрлэх эрх бүхий албан тушаалтнуудыг сонгох хариуцлагатай цаг үе ирж байна. Сонгуулийн кампанит ажил хэдийн эхэлж, нам, эвслийн нэр дэвшигчид эл далдаар сурталчилгааны ажлаа явуулаад эхэлжээ.Орон нутгийн сонгуулийн талаар иргэд ямар мэдээлэлтэй байгаа талаар сонирхлоо.

Иргэд, олон нийт орон нутгийн сонгуульд төдийлөн ач холбогдол өгдөггүй. Энэ нь ч гурван шатны сонгуулиас орон нутгийн сонгууль хамгийн бага ирцтэй гэх судалгаа, баримтаар нотлогддог. Нөгөө талдаа ИТХ-ын сонгууль иргэдэд ямар ач холбогдолтой талаар мэдээлэл хомс байдагтай холбоотой. Өнгөрсөн парламентын үед баталсан Үндсэн хуульд нэмэлт, өөрчлөлттэй холбоотой Засаг захиргааны нэгж, түүний удирдлагын тухай хууль, Хот тосгоны эрх зүйн байдлын тухай хуулийн шинэчилсэн найруулгын төслийг намрын чуулганаар хэлэлцэнэ. Ингэснээр орон нутгийн удирдлагуудын эрх нэмэгдэх юм. Иймд иргэд энэ удаагийн орон нутгийн сонгуульд анхаарал хандуулах зайлшгүй шаардлага үүсэж байгаа юм.