УИХ-ын чуулган хуралдаж “Монгол Улсад КОВИД-19-аас урьдчилан сэргийлэх, хариу арга хэмжээ авах, бэлэн байдлыг хангах төсөл”-ийг соёрхон батлах тухай хуулийн төслийн нэмэлт санхүүжилтын талаар хэлэлцэж байна. Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Д.Ганбат: Зээл авах гээд хуулийн төсөл оруулж ирж байна. Үүний зорилго нь вакцин авах юм байна. ДЭМБ-аар батлагдсан вакциныг оруулж ирэх ёстой. Манай улс Дархлаажуулалтын хуультай. Энэ хуулийн дагуу явж чадаж байна уу, үгүй юү. Энд тэндхийн хандив, тусламжаар орж ирсэн вакцин хийж байна. Засгийн газар ингэж болохгүй. Энэ мөнгө хэзээ орж ирэх вэ. Яг ямар вакцин оруулж ирэх вэ. Вакцин хийлгэсэн 532 хүнээс халдвар илрээд байна. Үүнд үнэлэлт, дүгнэлт хийсэн үү.

Сангийн сайд Б.Жавхлан: Бид өнгөрсөн онд төсвөө баталж байх үед коронавирусийн эсрэг вакцинууд ДЭМБ-аар баталгаажаагүй байсан. Үнэ нь мөн тодорхойгүй байсан. Файзер вакцин 2020 оны арванхоёрдугаар сарын 31, АстраЗенека 2021 оны хоёрдугаар сарын 15-нд  ДЭМБ-аар баталгаажсан. Тийм учраас бид аль вакцин нь зах зээлд нийлүүлэгдэх талаар мэдээлэлгүй байсан. Одоо ч гэсэн вакцины үнэ зах зээлд өөр өөр үнэ ханшаар нийлүүлэгдэж байна. Бид дэлхйи нийттэй хөл зэрэгцээд явж байгаа. Вакцинжуулалтын түвшний хувьд бид Азидаа гологдохооргүй, хоцроогүй байна. Манай улс эхний тавд явж байна. Гэхдээ бид цөөхөн хүн амтай, халдварын тархалтын хэмжээтэй харьцуулах юм бол вакцинжуулалтаа маш хурдацтай эрчимжүүлэх шаардлагатай байгаа. Өнөөдрийн байдлаар бид зорилтот 60 хувийнхаа 20 гаруй хувийг вакцинжуулаад байна. Зургадугаар сар гэхэд зорилтот хүн амынхаа 60 хувьд хүргэхээр зорьж ажиллаж байна. Вакцины нөөц үлдэгдэл 36 мянган тун бий.

Вакцины эхний тунгаа хийлгэсэн 500 гаруй хүн халдвар авсан нь үнэн. Гэхдээ энэ бол зөвхөн манай улсад тохиолдож байгаа зүйл биш. Гэрээ бол хийгдсэн. Хуулийн төслийг өнөөдөр соёрхон баталснаар захиран зарцуулах эрхтэй болно. Яг ямар вакцин оруулж ирэх талаар гэрээ хэлэлцээрүүд хийгдэж байна.

Өнөөдөр БНХАУ-ын Синофарм үйлдвэрийн Вероселл вакцины 300 мянган тун, мөн энэ сарын 9-нд 600 мянган тун бууна. Хоёр удаагийн татан авалтаар БНХАУ-ын Вероселл вакцины 900 мянган тунг авна.