Ерөнхий сайд Л.Оюун-Эрдэнэ өнөөдөр Ажлын байрыг дэмжих гурван хувийн хүүтэй зээл олголтын нөхцөл байдалтай танилцахаар Хаан банкан дээр ажилласан. Энэ үеэр коронавирусийн эсрэг вакцины татан авалтын талаар мэдээлэл өглөө. Тэрбээр “Манай улс Ази нохмон далайн орнууд дунд вакцинжуулалтын хурдаараа Сингапур Улсын дараа, хоёрдугаарт бичигдэж байна. Харин дэлхийн улс орнуудад 16, 17-д жагсаж байна. Манай улсын хувьд тавдугаар сар гэдэг эдийн засгийн хувьд идэвхждэг цаг хугацаа. Цар тахлын нөлөөгөөр Европын болоод Ази, номхон далайн улс орнуудын эдийн засаг саармагжаад байгаа. Үүнээс гарах цор ганц арга нь вакцинжуулалт юм. Тэгэхээр ирэх дөрөвдүгээр сар вакцинжуулалтын сар байх болов уу.

БНХАУ-аас Синофарм эмийн үйлдвэрийн Вероселл вакцины 900 орчим мянган тунг авахаар болсон. Үүний 300 орчим мянган тун нь дөрөвдүгээр сарын 1-нээс өмнө орж ирнэ

ОХУ-аас Спутник-V вакцины 300 мянган тунг тусламжаар авсан бол нэг сая тунг арилжааны шугамаар авахаар хөөцөлдөж байна. Өчигдөр тус улсад суугаа элчин сайд таатай мэдээ дуулгасан. Тодруулбал, ОХУ-аас вакцины тун авах манай улсын дугаарлалт урагшилсан гэдгийг хэлсэн. Энэ дагуу өнөөдрөөс эхлэн хэлцлүүд хийгдэнэ. Харин Энэтхэгийн Засгийн газартай АстраЗенека вакцины тунг дахин авах талаар ярьж байна. Нааштай мэдээнүүд дуулдаж байгаа. Үүнийг олон нийтэд хэлэх цаг арай болоогүй байна. БНХАУ-аас Синофарм эмийн үйлдвэрийн Вероселл вакцины 900 орчим мянган тунг авахаар болсон. Үүний 300 орчим мянган тун нь дөрөвдүгээр сарын 1-нээс өмнө орж ирнэ. Мөн Япон Улсын Засгийн газартай хэлэлцээр хийж Ковакс хөтөлбөрийг хэрхэн наашлуулах тухай ярьж байна.

Ерөнхий сайдын хувьд надад байгаа мэдээллээр ирэх тавдугаар сарын 9 буюу Засгийн газрын эхний 100 хоногт багтаан долдугаар сарын 1-нд гэж амласан амлалт маань 1-2 сараар наашилж магадгүй. Ямартай ч 4-5 сар вакцинжуулалтын хувьд үсрэнгүй үр дүнд хүрсэн байх болно гэж үзэж байна" хэмээн ярилаа.