Ерөнхий сайд Л.Оюун-Эрдэнэ өнөөдөр Ажлын байрыг дэмжих гурван хувийн хүүтэй зээл олголтын нөхцөл байдалтай танилцахаар Хаан банкан дээр ажилласан. Энэ үеэр дөрөвдүгээр сарын 5-наас эхлэн 14 хоногийн хугацаанд хөл хорио тогтоох магадлал өндөр байгаа талаар хэлэв. Тэрбээр “Цар тахал хүрээгээ тэлсээр байна. Хэрвээ хөл хорионы хатуу дэглэм тогтоохоор бол 10-14 хоногийн өмнө мэдээлнэ гэсний дагуу хэлэхэд дөрөвдүгээр сарын 5-наас хөл хорьж магадгүй.

Өнөөдөр Засгийн газрын зарим гишүүд хамтарсан хурал хийж нөхцөл байдлыг дахин үнэлнэ.Үүнд Улаанбаатар хотын удирдлагуудыг оролцуулна

Засгийн газар хөл хорио тогтоохгүйн төлөө байгаа. Үүнийг иргэд, аж ахуйн нэгж байгууллагууд ойлгож байгаа байх. Хөл хорио тогтоох амархан. Хэрэв тогтоовол эдийн засагт гарч буй таатай үзүүлэлт зогсоно. Олон улсын 2-3 эрүүл мэндийн байгууллагатай хамтран ажиллаж байна. Эрсдэлтэй түвшинд байна гэсэн үр дүнд хүрвэл бид хөл хорионы хатуу дэглэм тогтоохоос өөр аргагүй. Одоогоор дөрөвдүгээр сарын 5-19-нд хөл хорио тогтоох магадлал өндөр байна. Тийм учраас аж ахуйн нэгж байгууллагуудад хандаж хэлэхэд хөл хорионы 14 хоногийн хугацааг яаж хохирол багатай туулах вэ гэдэгт анхаарах хэрэгтэй” гэлээ.