Аж үйлдвэр Эрдэс баялагийн сайд асан Ц.Туваан шадар туслахуудаараа дамжуулан авлига, албан тушаалын хэрэгт холбогдсон байж болзошгүй талаар бид мэдээлсэн.

       Тодруулбал, УИХ-ын гишүүн Ц.Туваан Аж үйлдвэр, эрдэс баялагийн сайдаар ажиллаж байх үедээ Ашигт малтмал, газрын тосны газрын даргаар томилогдсон Ш.Ганхуяг “Алтжин” группын захирал агсан Г.Алтангийн хүү Э.Сүрэнгээс 2.5 тэрбум төгрөгийн авлига авсан байж болзошгүй хэргээр шалгагдаж байна. Уг авлигын хэргийг УИХ-ын гишүүн Ц.Туваан зуучлан, Ашигт малтмал, газрын тосны газрын дарга асан Ш.Ганхуягтай хуйвалдаж, адуучин дүү, Дорнодын газрын тосны 19 дүгээр талбайн Засгийн газрын төлөөлөгч Г.Ган-Одынхоо дансаар дамжуулсан байж болзошгүй хэргийг хууль хяналтын байгууллагаас шалгаж эхэлсэн аж. Тэгвэл бид 1.2 тэрбум төгрөгийг дансаараа дамжуулж авсан байж болзошгүй Г.Ган-Одтой холбогдож тодруулахад “Хуулийн байгууллагаас намайг шалгаагүй. Би Ц.Туваан сайдын үед Дорнодын газрын тосны 19 дүгээр талбайн Засгийн газрын төлөөлөгчөөр томилогдсон. Ц.Туваан сайдын танина. Ц.Туваан сайдын үед АМГТГ-т томилогдсон нь үнэн” хэмээн мэдээллээ.

    Г.Ган-Од гэгч нь Ц.Тувааны хуурай дүү, Дорнод аймгийн Матад сумын харьяат. Алдарт уяач Ц.Тувааны мориных нь зүчээг хариуцаж, адууных нь ажлыг хийдэг байсан. Ингээд Ц.Тувааныг Аж үйлдвэр, эрдэс баялгийн сайд болоход нь Дорнод аймгийн Матад, Халхгол сумын нутагт газрын тосны үйл ажиллагаа явуулдаг “Петрочайна дачин тамсаг” ХХК-ийн газрын тосны 19 дүгээр талбайг хянах Засгийн газрын төлөөлөгчөөр томилжээ. Өөрөөр хэлбэл, уг талбайд Монголын талын эрх ашгийг хамгаалах, хяналт тавих маш чухал үүргийг гүйцэтгэх албан тушаалд адуучин дүү Г.Ган-Одыгоо томилсон байж таарах нь. Тэгвэл АМГТГ-ын дарга асан Ш.Ганхуягтай хоршиж, дансаараа их хэмжээний мөнгө авсан байж болзошгүй Г.Ган-Од нь мэдүүлгээ хэрхэн өгч, дансаараа дамжсан мөнгөө тайлбарлахаас УИХ-ын гишүүн Ц.Тувааны авилга албан тушаалын хэрэг хэрхэн нь тодорхой болох аж.

Дэлгэрэнгүй эндээс уншаарай