Г.Занданшатарын Засгийн газрыг огцруулахаар сөрөг хүчин Ардчилсан намынхан акц өрнүүлж эхэллээ. Өөрөөр хэлбэл, дэд сайд нарын томилгоог эсэргүүцэж, УИХ дах Ардчилсан намын бүлгээс Засгийн газрыг огцруулах албан шаардлагаа өчигдөр Ерөнхий сайдад хүргүүлсэн. Үндсэндээ Засгийн газрын 15 дэд сайдын томилгоо, 128 бүтээмжийн менежерийг чөлөөлсөн асуудал дээр дөрөөлсөн энэ шаардлагын ард АН эрх баригчидтай тохироонд хүрэх асуудал байгааг илэрхийлж байгаа нь илт байна.

        Ингэснээр Засгийн газар гаргасан шийдвэртээ тодорхой хариу өгөхгүй бол Ардчилсан намынхан Засгийн газрыг огцруулах 22 кнопын эрэлд гарна. Үндсэндээ нийт гишүүдийн гуравны хоёрын саналаар Засгийн газрыг огцруулах хуулийн заалт хэрэгжиж 126 гишүүнтэй парламентаас 64 гишүүний саналаар Засгийн газрыг огцруулах боломжтой болсон гэсэн үг. Ийн Их хуралд одоогийн сөрөг хүчин АН 42 суудалтай болоод буй. Нэмээд МАН-ын хагарал бүрэн эвэндээ ороогүй байгаа цаг үед сөрөг хүчнийхэнд хүч нэмэх кнопны гишүүд мэр сэр байхыг үгүйсгэхгүй. Хамтарсан Засгийн газарт “жийгдсэн” Н.Номтойбаярын Үндэсний эвсэлийнхэн АН-д хүч нэмэх бүрэн боломжтой. Ингээд харвал Г.Занданшатарын Засгийн газар тун эмзэг цаг үед ирчихсэн гэсэн үг. 

             Г.Занданшатарын Засгийн газрын хувь заяа дээсэн дөрөөн дээр дэнжигнэх боллоо. Засгийн газар бүрдээд жил болоогүй атал сайд нарын халаа сэлгээ хэдэнтэй хийж, хоёр ч удаа огцруулах санал орж ирлээ.

            Засгийн газрыг огцруулах талаар Энэ талаар УИХ дахь Ардчилсан намын бүлгийн дарга О.Цогтгэрэл “Татвар төлөгч аж ахуйн нэгжүүд хүнд байдалд орсон. Эхнээсээ дампуурлаа зарлаж байна. Хувийн хэвшлүүд хүнд нөхцөлд , Төрийн хэмнэлтийн тухай хууль хүчин төгөлдөр үйлчилж байхад Монгол Улсын Засгийн газраас дэд сайд нарыг  томилж, нийт 40 сайдтай болж байна. Үүнийгээ тайлбарлахдаа бүтээмж болон хяналтын менежерийг цомхотгосон гэж худлаа ярьж байна. Тэднийг бүгдийг цомхотгох ёстой. Хуульд заасан 8-9 хувийн цомхотголоо ч хийх ёстой. Хэрвээ Ардчилсан намын бүлгээс тавьж байгаа шаардлагыг биелүүлэхгүй бол Засгийн газрыг огцруулах санал тавина” гэж мэдэгдсэн юм. Тэгвэл Г.Занданшатарын Засгийн газрыг унагааж мэдэх хамгийн эмзэг асуудал нь шатахууны болоод байна. Өнгөрсөн аравдугаар сараас хойш дэн дун таг зогсоочихгүй байгаа шатахууны хомстол иргэдийг олон цагаар дараалалд зогсоож, бухимдуулж байна. Ер нь Г.Занданшатарын “ангийнхан” танхим дотроо тун таарамжгүй байгаа нь ч үнэн. Эргэн сануулахад өнгөрсөн сард ХЗДХ-ийн сайд Б.Энхбаяр, Батлан хамгаалахын сайд Д.Батлут, Эрүүл мэндийн сайд Ж.Чинбүрэн нар маргалдаж улмаар зодолдож биенээ хүнд гэмтээсэн гэх мэдээлэл цацагдсан. Хэдийгээр Засгийн газрын сайд нар уг мэдээллийн үгүйсгэж байгаа ч хэн хэн нь олны өмнө бэртэлтэй гарч ирсэнд олон нийт одоо хүртэл эргэлзэж байна.

         Улмаар өнгөрсөн долоо хоногт ЗГХЭГ-ын дарга С.Бямбацогт, Аж үйлдвэр эрдэс баялагийн сайд Г.Дамдинням нарын “ууртай” мэдэгдлүүд  олны анхаарлыг татаж, танхимдаа таарахаа байсныг илтгээд буй. Өөрөөр хэлбэл, ЗГХЭГ-ын дарга С.Бямбацогт Зэс боловсруулах үйлдвэрийн сонгон шалгаруулалтыг зарлах талаар мэдээлэл хийсэн. Харин энэ үеэр Аж үйлдвэр, эрдэс баялагийн сайд Г.Дамдинням цахим хуудастаа "Манайх Уул уурхайн салбар хоёр сайдтай болсон. Одоо Аж үйлдвэрийн хоёр дахь сайдтай болсон шүү дээ. Төсөл сорчилно, ТӨК-д сорчилно" гэж байр сууриа илэрхийлсэн нь шууд утгаараа ЗГХЭГ-ын дарга С.Бямбацогт руу чиглэсэн улс төрийн зөрчилдөөн гэж харагдаж байгаа юм. Өөрөөр хэлбэл, энэ асуудлыг Г.Дамдинням сайд анх удаагаа сөхөөгүй. 2026 оны төсвийн хэлэлцүүлгийн үеэр ч тэд ийн үг хаялцаж байсан нь ард түмний ой санамжинд үлдсэн билээ. Ийн гал дээр тос гэгчээр Засгийн газрын сайд нар дотроо ил далдаар зодолдоод эхэлсэн нь илт байна.

        Ил болсон эдгээр сайдаар гадна Г.Занданшатараас хатуухан сануулга авсан хэд хэдэн сайд бий. Тухайлбал, УИХ-ын дарга асан Д.Амарбаясгалангийн талд илт орсон С.Амарсайханыг  танхимаасаа гаргасан бол далд дэмжиж байсан хэд хэдэн сайд сануулгатай байгаа гэх бор шувуу Саарал ордноор нисэх болсон. Тодруулбал, Шадар сайд Т.Доржханд, Зам тээвэр хөгжлийн сайд Б.Дэлгэрсайхан, Эрчим хүчний сайд Б.Чойжилсүрэн нар УИХ-ын даргыг унагаах 35-ын бүлэгт багтсан ч начир дээрээ УИХ-ын дарга Д.Амарбаясгалангийн арыг “хамгаалж” байсан гэх мэдээлэл олны дунд гарч байсан нь худлаа цуурхал биш байсан аж.

        Нэмээд Засгийн газар, хууль хяналтын байгууллагаас Төрийн өмчит компаниудад хяналт шалгалт оруулж, халаа сэлгээ хийж эхэлсэн нь ч учиртай. Өчигдөр гэхэд Ерөнхий сайд Дулаан IV цахилгаан станцад ажиллаж, тус компанид хийсэн шалгалтаар олон зөрчил илэрсэн гэдгийг мэдээллээд байна.

       Тиймээс ирэх оноос өмнө Ерөнхий сайд Г.Занданшатар танхимдаа засвар оруулж, сайд нараасаа “шүд” сугалах компанит ажил өрнүүлэх бололтой.  Ингэж “шүд сугалах” байдлаар Г.Занданшатар хуучин сайд нараасаа салж, АН-тай хамтрах асуудал дахин сөхөгдөж мэдэх нь.