Аав болгон С.Шаарийбуу гуай шиг тэмцэж чадах болов уу. Хүний нутагт охиноо алдчихаад хэргийг нь үнэн зөвөөр шийдүүлэхийн тулд бүтэн 20 жил орь ганцаараа зүтгэсэн энэ хүн хэчнээн шөнө нойргүй хоносон бол доо, хөөрхий. Харамсалтай нь түүнд хэн ч туслаж чадаагүй. Үе үеийн  Ерөнхийлөгч, Ерөнхий сайд, хууль хяналтынхан гээд нааштай хандаж болох хүн бүр зугтаж, нүүр буруулж байсан. Өөрөөр хэлбэл, Монголын төр түүнийг тоогоогүй. Түүний охины үхлийг ч тоогоогүй. Нэг ч болтугай шүүх хуралд нь хамт очиж, харийн улсад амиа алдсан иргэнийхээ амийг нэхэж, хэргийнх учирыг олоход нь тус нэмэр болчихоор хүн бишгүй л бий. Харин түүнд туслах нь битгий хэл охиных нь амиа алдсан хэргээр улс төрийн зарим томчууд гадныхантай наймаалцдаг гэх мэдээлэл хүртэл гарч байсан.  

Ш.АЛТАНТУЯА МӨНГӨ УГААЛТЫН ГЭРЧ БОЛСОНООРОО БУСДЫН ГАРТ АМИА АЛДСАН

      Ш.Алтантуяаг 2006 оны аравдугаар сарын 19-нд тухайн үеийн Малайзын Шадар сайд Нажиб Разакын зөвлөх Разак Багиндагийн захиалгаар, цагдаагийн офицерууд болох Азила Хадри, Сирул Азхар нар буудаж хөнөөгөөд, дараа нь дэлбэлсэн. Ш.Алтантуяа тухайн үед буюу 2004-2006 онд Малайзын Шадар сайд Нажиб Разак болон түүний зөвлөх Разак Багиндагийн орчуулагчаар ажиллаж байхдаа тэдний Франц Улстай хийж буй тэрбум еврогийн хэлэлцээрийн гэрч болсон байдаг. Тэгээд түүнийг их мөнгөний луйварын шалтгааныг мэдэж байгаа гээд хөнөөчихсөн. Бүхнээс нандигнаж өсгөсөн ганц охиныг нь ингэж онц хэрцгийгээр хөнөөж, ойд аваачаад оршуулах цогцос ч үлдээхгүйгээр дэлбэлж хаясан харгис хэрэгтнүүдийн шүүх хурлыг үнэн зөвөөр шийдэгдэхийг С.Шаарийбуу гуай 20 жил хүлээж байна.  

Ш.АЛТАНТУЯАГ ХӨНӨӨХИЙГ ЗАХИАЛСАН ЗАХИАЛАГЧИЙГ МОНГОЛЧУУД АВЛИГА АВЧ, "ХАМГААЛДАГ УУ"

       Улс төрийн нөлөө бүхий томчууд Малайзад онц хэрцгийгээр амиа алдсан Ш.Алтантуяагийн хэргээр наймаалцаж, их хэмжээний мөнгө, албан тушаал авдаг байж болзошгүй мэдээлэл ил болсон юм. Тухайлбал, Малайзад амиа алдсан Ш.Алтантуяагийн хэрэгтэй холбоотой хамгийн чухал шүүх хурал 2012 онд болж байжээ. Тухайн үед Гадаад харилцааны сайдаар ажиллаж байсан Сү.Батболд Малайзын баялагийн сангаас 15 сая орчим ам.доллар авсан нь Ш.Алтантуяагийн хэргийг үнэн зөвөөр шийдэх шүүхийн шийдвэрт сөргөөр нөлөөлж, ашиг сонирхлын зөрчил бий болгосон гэж хардахад хүргэдэг тухай зарим эх сурвалж мэдээлсэн юм. Өөрөөр хэлбэл, тухайн улсын тэр их мөнгийг Сү.Батболд юунд зарцуулах гэж, яах гэж авсан бэ гэдэг нь асуудал дагуулдаг байна. Мөн тэрхүү их хэмжээний мөнгийг юунд, хэрхэн зарцуулсан болохыг мэдэгдэх хариу тайлбар ирүүлэхийг Малайзын Засгийн газраас удаа дараа ирүүлсэн боловч манай улсын холбогдох аль ч байгууллага Сү.Батболдыг "Хариу тайлбараа өг" гэж шаардахгүй байсаар удсан гэдэг.

С.ШААРИЙБУУГИЙН ХОХИРЛЫН МӨНГИЙГ МАЛАЙЗЫН ЗАСГИЙН ГАЗРААС ХЭЗЭЭ БАРАГДУУЛАХ ВЭ

      Малайз Улсад амиа алдсан Ш.Алтантуяагийн амиа алдсан түүний аав С.Шаарийбууд Малайзын Засгийн газраас нөхөн төлбөр олгох ёстой гэсэн шүүхийн шийдвэр гаргасан байдаг. Тэгвэл Малайзын Засгийн газар анхан шатны шүүхийн шийдвэрийг зөвшөөрөөгүй учир давж заалдах шатны шүүх хурал зарласан байдаг. Анхан шатны шүүхийн шийдвэрийн талаар ХЭҮК-ийн дарга Д.Сүнжид "ХЭҮК Монгол Улсын Гадаад харилцааны яамтай хамтраад Малайз Улсын Хүний эрхийн үндэсний комисстой уулзалт хийж, Монгол дахь болон Малайз дахь өмгөөлөгч нартай нь холбогдсон. Яриа хэлэлцээг идэвхжүүлсний үр дүнд тодорхой ахиц гарсан. Анхан шатны шүүхээс тодорхой мөнгөн дүн төлөх ёстой гэж гарсан. Тусгай баталгаажуулах данс нээгдсэн байгаа. Одоогоор захиран зарцуулах эрх байхгүй. Шүүх хурал товлогдсон. Өмнө нь бүх юм тодорхойгүй байсан. Малайзын засгийн газраас оногдуулсан нөхөн төлбөрийг нь өгөхгүй гэж давж заалдсан байсан юм. ХЭҮК-оос шаардлагатай бол шүүх хуралд нь оролцоно. Одоогоор өмгөөлөгч нартай нь санал солилцоод явж байна. Монгол Улсын иргэний амь нас хохирчихсон байхад Монгол Улсын Засгийн газар хяналтаа тавиад үүргээ биелүүлэх ёстой. Бид эрхийг нь сэргээхийн төлөө ажиллах хэрэгтэй" хэмээж байв. Харин С.Шаарийбуу гуай давж заалдах шатны шүүх хуралд явахаасаа өмнө өөрийн цахим хуудастаа "Малайзын төр надтай давж заалдсан хуралд явна. Монголчууд түүхэндээ хэзээч сөгдөөгүй" хэмээн байр сууриа илэрхийлж байв.