УИХ-ын гишүүн асан Б.Баярсайхан “УИХ-МАН-Бүлэг-2020” групп чат дээр “Б.Пүрэвдорж гишүүн ажлын байранд ёс зүйгүй, увайгүй хүчирхийлэлийн шинжтэй үйлдэл гаргалаа. Ямар ёс зүйтэй хүмүүс төрд ороод ирчихсэн юм бэ” хэмээн бичиж байжээ. Түүнд нь УИХ-ын дэд дарга Б.Булгантуяагийн “Тэгдэг шүү. Би ч хэд хэдэн удаа өртсөн” хэмээн бичиж байсан чат нь өнөөдөр олон нийтийн сүлжээнд ил боллоо. Энэ талаар УИХ-ын гишүүн Б.Пүрэвдоржтой холбогдож, тодруулахаар гар утас руу нь залгахад түүний туслах тайлбар өглөө.

    Тэрбээр “Б.Пүрэвдорж гишүүн ёс зүйгүй, хүчирхийлэлийн шинжтэй үйлдэл хэзээ ч гаргаж байгаагүй. Тийм учраас өөрсдийгөө Б.Пүрэвдорж гишүүний хүчирхийлэлд өртсөн мэтээр бичиж, яриад байгаа гишүүд хуулийн байгууллагад хандаж чадахгүй. Харин бид Б.Пүрэвдорж гишүүнийг гүтгэсэн энэ байдал цаашид даамжрах юм болж хуулийн байгууллагад хандах болно. Б.Пүрэвдорж гишүүнийг ёс зүйгүй, хүчирхийлэлийн шинжтэй үйлдэл гаргасан гэж бичиж буй гишүүдийг зохион байгуулалттай, өшөө авах зорилгоор дээрх чатыг ил болгосон гэж үзэж байгаа. Б.Баярсайхан УИХ-ын гишүүн байхдаа Б.Пүрэвдорж гишүүнийг мөн хүчирхийлэлийн шинжтэй үйлдэл гаргасан мэтээр ярьж байсан. Тухайн үед Б.Пүрэвдорж гишүүн санамсаргүй байдлаар түүнийг тохойгоороо шүргэсэн юм билээ. Одоо дахин тэр тухай олон нийтэд тарааж байгааг нь улс төрийн зорилготой гэж үзэж байна” гэсэн юм.

     Мөн УИХ-ын гишүүн Э.Болормаа өчигдөр сэтгүүлчдэд яриа өгөхдөө “Ордонд эмэгтэй гишүүнийг ажлын байран дээр нь бэлгийн дарамт үзүүлсэн тохиолдол ч гарсан. УИХ-ын даргадаа очоод хэлэхээр "Чимээгүй өнгөөрөөчих дөө" гэж хэлдэг хэмээн ярьсан байдаг.