УИХ-ын гишүүн Э.Болормааг шүүхээс албадан ирүүлэх шаардлага хүргүүлсэн талаар мэдээлэл гаргаад буй. Тодруулбал, түүнийг 2024 оны сонгуулийн үеэр гаднын хөрөнгө оруулалттай компаниас сонгуулийн санхүүжилт авсан нь Сонгулийн тухай хууль зөрчиж байна гэх хэрэгт буруутган  шалгаж байгаа талаар хуулийн байгууллагаас мэдээлсэн.

Тэгвэл энэ асуудлаар тэрбээр байр сууриа илэрхийллээ. "Би энэ талаар удаа дараа тайлбар өгсөн. Үүнийг дахин сөхөж гаргаж ирлээ. Энэ асуудлыг дэгдээх сонирхолтой манай намын ах нар байх шиг байна. Гаднын хөрөнгө оруулалттай компаниас хандив авсан бол хуулийн дагуу нэгдүгээрт хандив өгсөн компани нь хариуцлага хүлээнэ. Хоёрдугаарт, нэр дэвшигч болон сонгуулийн штаб нь хариуцлага хүлээх ёстой. Үүнийг би санаатай үйлдэл гэж хардаг. Өөрөөр хэлбэл, энэ компани  сонгуулийн хандив өгснийхөө дараа нэрээ өөрчилсөн. Энэ нь бусдыг төөрөгдүүлэх арга. Хэрвээ тийм бол тухайн сонгуулийг хариуцаж байсан ажилтнуудад торгууль ногдуулдаг зохицуулалтай. Аливаа гишүүний эгүүлэн татах хуулийн зохицуулалтгүй. Сонгуулийн үед ялагдахаа мэдэгдсэн, анхнаасаа зохиолоо зурсан байх магадлалтай. Ингээд нэг гишүүнийг эгүүлэн татаж, нөхөн сонгуулиар дахин гарч ирэхээр мөрөөдсөн хэдэн ах нарын хийж байгаа зохиол гэж харж байна. Тухайн компанийг би мэдэхгүй, танихгүй. Тиймээс тухайн компанийг санаатайгаар үүнийг зохион байгуулсан байж магадгүй гээд цагдаагийн байгууллагад би хандсан. Хэрвээ гаднын хөрөнгө оруулалттай гэдгийг нь мэдэж байсан бол ил тод нээлттэй дансаараа мөнгө аваад сууж байх уу" гэлээ.