УИХ-ын гишүүн Д.Бум-Очир цагаан сарын битүүнийг амралтын өдөр болгох хуулийн төсөл санаачлаад буй. Үүнтэй холбоотойгоор тэрбээр "Битүүн бол амралтын өдөр гэж байгаа боловч угтаа их ачаалалтай байдаг. Нөгөө талаар энэ бол Монголын ёс. Цагаан сар гэдэг бол битүүнээ оруулаад тэмдэглэдэг баяр. Нэг нь жилийн сүүлийн өдөр, нөгөө нь жилийн эхний өдөр. Олон зан үйл байдаг. Тэгэхээр монгол хүний дархлааны асуудал. Өнгөрсөн жил шинийн нэгэн байхгүй байсан. Цагаан сарын баяраар амарч байгаа өдрүүд зарим жилийн тухайд цөөн байдагтай холбоотойгоор битүүний өдрийг амралтын өдөрт оруулья гэж үзсэн. Мөн нэгэн зүйл нь цагаан сарын амралт цөөн байх тусмаа зам тээврийн осол их бүртгэгддэг гэх мэдээлэл байна. Тэгэхээр үндэснийхээ уламжлал болсон баяраа аажуу тайван тэмдэглэх, орон нутагт байгаа аав, ээж, ах дүү нартайгаа золгох нь чухал юм" гэв.