Уул уурхай ухдаггүй, улсынхаа мөнгийг завшдаггүй, чин шударгын дүртэй, гудамжнаас гарсан улстөрч хэмээн өөрийгөө өргөмжилдөг УИХ-ын гишүүн С.Ганбаатар үнэн хэрэгтэй бусдаас хөрөнгөө нуусан хамгийн будлиантай нэгэн. Саяхан даа УИХ-ын гишүүн С.Ганбаатарын МҮЭХ-ны албан тушаалтнуудтай холбоотой АТГ-аас нэгжлэг хийх сургаар ухаангүй гүйж очоод цахим орчинд лайв хийж, сандарч байсан. Санаандгүй тохиолдлоор гүйж очоогүй гэдгийг учир мэдэх албаныхан удаа дараа мэдэгдэж байв. Гэтэл УИХ-ын гишүүн С.Ганбаатар жил жилийн хөрөнгө орлогын мэдүүлэгээ хамгийн багаар мэдүүлж, хуулийнханаас бултаж, ард түмнийг төөрөгдүүлж ирсэн. Үнэндээ УИХ-д гурвантаа сонгогдож, Ерөнхийлөгчийн суудалд хүч үзэж явсан түүнийг чаа гэх ямаагүй, туу гэх нохойгүй гэдэгт хэн ч итгэхээргүй хөрөнгөө далдалж ирсэн нь ч нууц биш.

УИХ-ын гишүүн С.Ганбаатар өөрийнхөө хөрөнгө орлогын мэдүүлэгт “Цэцэн буйрхан”, “Баршим” гэх хоёрхон компани бүртгүүлсэн. Харин эхнэр Б.Тунгалагийнх нь нэр дээр бүртгэлтэй 10 гаруй компани, төрсөн дүү нарынх нь нэр дээр ТББ-ууд, туслах зөвлөхийнхөө нэр дээр холбоод байгуулаад зогсохгүй, баз хадмуудынхаа нэр дээр тендер түүдэг аж.

С.ГАНБААТАРЫН ЭХНЭРИЙНХЭЭ НЭР ДЭЭР НУУСАН КОМПАНИ

        С.Ганбаатарын хувьд хөрөнгө орлогын мэдүүлэгтээ хоёрхон компанитай Тухайлбал, аялал жуулчлалын чиглэлээр 2005 онд байгуулсан “Андискауред Монголиа” ХХК-ийг эхнэр Б.Тунгалагтайгаа хамтран эзэмшдэг ч, хөрөнгө орлогодоо мэдүүлээгүй байх жишээтэй. Цаашлаад  гадаад худалдаа, бизнесийн зөвөлгөө өгөх чиглэлээр байгуулсан  “Дархан ургах наран зүг” ХХК, аялал жуулчлалын чиглэлээр үйл ажиллагаа явуулдаг “Альпс ПНҮ”, “Ворлд плас файв”, “Монгол малын бэлчээрийн менежмент” ХХК,  “Боорчи баатар” ХХК, “Адвант трейд” ХХК зэрэг компаниа  эхнэр Б.Тунгалагийнхаа нэрээр  удирддаг байна.       

С.ГАНБААТАРЫН ТӨРСӨН ДҮҮ НАРТАА ХАРИУЦУУЛСАН ТӨРИЙН БУС БАЙГУУЛЛАГУУД

       УИХ-ын гишүүн С.Ганбаатар ах, дүү долуулаа. Эхээсээ эрт өнчирсөн дүү нараа өсгөж, хүмүүжүүлэх гэж хэрэндээ хичээсэн хэмээн улс төрд орж ирсэн. Харин хувьдаа бизнесгүй, хураасан хөрөнгө гэх зүйлгүй тэрбээр төрсөн дүү нараа  гаднын улсад сургаж, гадаадад ажиллаж, амьдрахад нь хэрхэн нөлөөлсөн бэ гэдэг нь  анхаарах асуудал болж байна.

          Улмаар дүү нартаа төрийн бус байгууллагуудаа хариуцуулдаг бол хадмууддаа бизнесээ “даатгадаг” байна.  Тухайлбал, С.Ганбаатарын төрсөн дүү С.Гандолгор “Монголын худалдааг дэмжих хамтын ажиллагааны үндэсний нийгэмлэг”-ийн гүйцэтгэх захирлаар бүртгэлтэй.  Улмаар “Сайнхүү ивээл сан”-г нь С.Гандолгор удирддаг бол эцсийн өмчлөгчөөр нь төрсөн дүү С.Гантуяа нь бүртгүүлсэн байна. Харин С.Ганхуяг нь “Монголын бичил уурхай эрхлэгчдийн эрх ашгийг хамгаалах холбоо”-ны удирдах зөвлөлийн даргаар бүртгэлтэй байжээ. Цаашлаад С.Гантуяагийн нэр дээр “Хотын хөгжлийн санаачлага” ТББ-ын удирдаж байна.  

ХАДМУУДДАА ЭЛЭГТЭЙ С.ГАНБААТАР

      Тэгвэл УИХ-ын гишүүн С.Ганбаатар ах, дүүс тойрон хүрээлэгчдийнхээ бизнесийг цэцэглүүлж, далдаас удирдаг байж болзошгүй баримтыг дэлгэж байна. Цаашлаад С.Ганбаатар төрсөн дүү нараасаа ч илүү хадмууддаа хөрөнгөө “хувааж” хамаарал бүхий этгээдүүдээсээ асуудлыг холдуулсан зальтай нэгэн байж ч мэдэх юм.

       Тодруулбал, С.Ганбаатар хадам дүү, баз хүргэн хоёрынхоо “Инкон тек” ХХК-ийг Дархан хотын цэвэрлэх байгууламжийг шинэчлэх 20 сая ам.долларын төслийн гүйцэтгэгчээр шалгаруулж, хувь хүртсэн байж болзошгүй баримт бий. Өөрөөр хэлбэл, Азийн хөгжлийн банкны 20.6 сая ам.доллар буюу 70 орчим тэрбум төгрөгийн хөнгөлөлттэй зээлээр Дархан хотын цэвэрлэх байгууламжийг шинэчлэх “Дархан хотын бохир усны менежмент сайжруулах-МОН3244” төслийг 2017 оны арванхоёрдугаар сараас хэрэгжүүлж эхэлсэн. Тэгвэл Дархан хотын цэвэрлэх байгууламжийг шинэчлэх төслийн 14 сая ам.долларын А1 багцын гүйцэтгэгчээр нь “Инкон тек” ХХК шалгаран ажилласан байдаг. Судлаад үзвэл, “Инкон тек” ХХК-ийг 2017 оны арваннэгдүгээр сарын 1-нд Бүргэдбазарын Майнбилэг үүсгэн байгуулсан. Харин тухайн үед “Инконтек” ХХК-ийн гүйцэтгэх захирлаар нь Зоригтын Баяр гэгч ажиллаж байжээ. Ингээд ердөө сарын дараа буюу 2017 оны арванхоёрдугаар сараас Дархан хотын цэвэрлэх байгууламжийг шинэчлэх төслийн гүйцэтгэгчээр ажиллаж эхэлсэн байгаа юм.

           “Инкон тек” ХХК-ийг эзэмшигч Б.Майнбилэг нь УИХ-ын гишүүн С.Ганбаатарын эхнэр Б.Тунгалагийн үеэл. Өөрөөр хэлбэл, Б.Тунгалагийн аав Бадамбазарын Балжиннямын төрсөн дүү Бадамбазарын Бүргэдбазарын охин. Харин “Инкон тек” ХХК-ийн Гүйцэтгэх захирал З.Баяр нь Б.Майнбилэгийн нөхөр буюу С.Ганбаатарын баз хүргэн. УИХ-ын гишүүн С.Ганбаатар Дархан-Уул аймагт өссөн, ахлах сургуулиа ч тэнд дүүргэсэн. Тиймдээ ч анх 2012 онд Дархан-Уул аймгаас УИХ-ын гишүүнээр сонгогдож, улс төрд хөл тавьж байлаа. Тэгэхээр Дархан-Уул аймгийн цэвэрлэх байгууламжийг 20 сая ам.доллар буюу 70 орчим тэрбум төгрөгөөр шинэчилнэ, энэ төслөөс асар их хувь хүртэж болно гэдгийг УИХ-ын гишүүн С.Ганбаатар тооцоолсон. Тиймдээ ч хадам дүү Б.Майнбилэг, баз хүргэн З.Баяр нарынхаа нэр дээр “Инконтек” ХХК-ийг байгуулж, улмаар Дархан хотын цэвэрлэх байгууламжийг шинэчлэх 70 тэрбум төгрөгийн төслийн гүйцэтгэгчээр шалгаруулж хувь хүртсэн байж болзошгүй ажээ. Магад, С.Ганбаатар Дарханы цэвэрлэх байгууламжийн төсөл хэрэгжиж эхлэх үед буюу 2017 онд УИХ-ын гишүүн байгаагүй, нөлөөлсөн байх боломжгүй гэж мэлзэх л байх. Гэхдээ Дархан хотын цэвэрлэх байгууламжийг Азийн хөгжлийн банкны 20 сая ам.долларын зээлээр шинэчлэх Засгийн газрын шийдвэр С.Ганбаатарыг УИХ-ын гишүүн байх үед буюу 2015 онд гарсан түүхтэй. Өдгөө Инконтек ХХК-ийн эзэмшигчээр Т.Баясгалан гэгч бүртгэлтэй болжээ.  С.Ганбаатар нэг ёсондоо хамаарал бүхий этгээдүүдээсээ компанийг шилжүүлж, баримтаа булзааруулсан байхыг үгүйсгэх юм. Сонирхуулахад, 2024 оны УИХ-ын сонгуулиар С.Ганбаатарын  сонгуулийн сурталчилгаанд хадмууд нь хандив өгсөн байна. Өөрөөр хэлбэл, С.Ганбаатар хадмуудынхаа бизнесийг дэмжиж, хариугаа сонгуулиар авсан бололтой. Тухайлбал, хадам аавынх нь төрсөн дүү Б.Бүргэдбазар 10 сая төгрөг түүний хүүхдүүд буюу С.Ганбаатарын эхнэрийн үеэлүүд болох Б.Майнбилэг, Б.Уранбилэг нар тус бүр 10 сая төгрөгийн хандив өгсөн байна. Мөн 2017 оны Ерөнхийлөгчийн сонгуульд нэр дэвшсэн С.Ганбаатарын гол хандивлагчдын нэг нь “Бумо” ХХК байсан. Тус компанийг С.Ганбаатарын эхнэрийн үеэл Бадамбазарын Батбилэг эзэмшдэг юм байна. Эндээс Б.Майнбилэг С.Ганбаатар хэн хэнээсээ бизнес болон улс төрийн талаас нь дэмждэг болох нь харагдаж байна.

      Дараагийн дугаарт бид С.Ганбаатар хадам дүү Б.Майнбилэгээрээ дамжуулж, ОХУ-ын бизнес эрхлэгчидтэй хэрхэн холбогддог болохыг  мэдээллэнэ.