УИХ-ын гишүүн С.Ганбаатар “Оюу толгойн”-н гэрээг цуцла” гэж “насаараа” орилж байгаа нэгэн. Хүүхэд нь, ач, зээ нь бараг л “Оюу толгой” гэж хэлд орсон болов уу, түүний. “Өлсөх”-өөрөө л Төв талбай руу гүйж, тэрийгээд хэвтчихдэг. Тэгээд “Оюу толгой”-н гэрээг яг одоо цуцла” гэх боломжгүй саналаар “боомилж”, баахан “юм” болдог. Эцэст нь, тэмцлээ зогсоогоод хэсэгтээ алга болно. Удалгүй, “уурлахаараа” Төв талбайг тойглоод, эргэж гарч ирдэг маршрутаар амьдарч байгаа “тэмцэгч”. Тэр ямартай ч Төв талбайд зургаан удаа өлсгөлөн зарлаад байна, “Оюу толгой”-н гэрээг эсэргүүцэж.

ӨЛСГӨЛӨН ҮҮ, ЭСВЭЛ ӨӨР ӨНЦӨГ БИЙ ЮҮ...

УИХ-ын гишүүн С.Ганбаатар хамгийн сүүлд 2021 онд “өлссөн”. Тэрбээр “МАН-ыг Рио Тинтогийн барьцаанаас чөлөөлж, алдагдсан “Оюу толгой”-гоо буцаан авах өлсгөлөн” нэртэй суултыг Төв талбайд идэр есийн хүйтэнд эхлүүлж байлаа. С.Ганбаатар гишүүн өлсгөлөн зарлаж эхлэхдээ “Рио Тинтотой хэлэлцээр хийх ганц хүн бол Ерөнхий сайд. МАН чадахгүй бол надад энэ эрхээ өгчих. Би сөрөг нэхэмжлэл гаргаад өгье. УИХ-ын гишүүн ард иргэдийн өмнө хариуцлага хүлээх гэж сонгогдсон. Би ард иргэдийг өлсгөлөн зарлахыг хүсэхгүй байна. Харин УИХ-ын гишүүд надтай нэгдэж, өлсгөлөн зарлаасай гэж хүсэж байна” мэдэгдэж байсан. Ингээд тав хоног “тарчилсан”-уу, эсвэл “тааваараа” хэвтсэн үү, ямартай ч өлсгөлөнгөө зогсоож байгаа мэдэгдээд, дахиж өлсгөлөн зарлаагүй байна.

Тэрбээр өлсгөлөнгөө зогсоохдоо “Бид “Оюу толгой”-н гэрээг монголчууддаа ашигтай болгоход маш том алхмаар урагшиллаа. Монгол Улсын Ерөнхий сайдаас өгсөн чиглэлийн дагуу Хууль зүй, дотоод хэргийн сайдын бичгийг та бүхэнд танилцуулж байна. Үүгээр өлсгөлөнгөө зогсоож, “Оюу толгой”-н гэрээг Монголдоо ашигтай болгохоор ажлын хэсэгт орж ажиллахаа мэдэгдэж байна. Та бүхэнд “Оюу толгой”-той холбоотой бүх асуудлаар мэдээ, мэдээллийг цаг тухайд нь мэдэгдэж байх болно" гэсэн байдаг. Өөрөөр хэлбэл, С.Ганбаатар гишүүн МАН-тай тохиролцож, Ажлын хэсэгт багтсан ч тэр өдрөөс хойш “алга” болсон.

Түүнийг өлсгөлөнгөө зогсоосноос хойш 1500 хоног лав хол давж өнгөрлөө. “Оюу толгой”-н гэрээ өөрчлөгдсөн ч үгүй, Арбитрийн шүүх дээр гацсан хэвээрээ байна. Засаг төр ч солигдлоо, С.Ганбаатар ч УИХ-д дахиад сонгогдлоо, асуудал өөрчлөгдсөнгүй. Үүнээс хардаж харвал, С.Ганбаатар гишүүний тав хоногийн тэмцэл өлсгөлөн байсан уу, эсвэл өөр өнцөг байв уу гэдэг нь эргэлзээтэй байгаа юм.

С.ГАНБААТАРЫН СҮҮЛЧИЙН МЭДЭГДЭЛ: “ОЮУ ТОЛГОЙ” БҮРЭН ДАМПУУРСАН

Дөрвөн жил дуугүй шахам явсан УИХ-ын гишүүн С.Ганбаатар өнгөрсөн нэгдүгээр сард хэлд орж, маш ноцтой мэдэгдэл хийсэн. Угтаа түүнийг “Оюу толгой” ордыг монголчуудад ашигтай байлгах алхмыг урагшлуулчихаад, ажил хэрэг болголоо” гэх болов уу гэж иргэд хүлээж байлаа. Гэтэл тэрбээр “Албан ёсоор хэлье. “Оюу толгой” дампуурчихсан. Өөрийн компанийн үнэ цэнээс ес дахин өндөр зээл авчихсан байгаа компанийг дампуураагүй гэж хэлвэл бизнесийн сонгодог ойлголт байхгүй хүн болж хувирна" гэсэн байдаг.

Дампуурчихсан компани гэж монголчуудад ашгаа өгөх юм бэ. Ийм нэг асуулттай иргэд зургаан сар “өлслөө”. Гэвч “Оюу толгой” ордын ажил хэвийн явагдаж, олборлолтоо хийсэн хэвээр байна. Эндээс С.Ганбаатар гишүүний мэдэгдэл үнэн, худал эсэх нь тодорхой харагдаж байгаа юм.

Мөн С.Ганбаатар гишүүний “насаараа” тэмцсэн тэмцэл дампуурлаар төгсвөл мөн ч гунигтай хэрэг. Яг л “Одоо “Оюу толгой”-гоос авах мөнгө байхгүй болсон. Тэгэхээр тэгж тэмцэхгүй” гэж байгаа мэт сонсогдож байна.

С.ГАНБААТАРЫН ДҮҮ С.ГАНТУЯА “ОЮУ ТОЛГОЙ” ХХК-ААС ХӨӨГДӨЖ БАЙЛАА

Ам нээх олгондоо “Оюу толгой”-н гэрээг шүүмжилж, монголчууд ашгийг хүртэх хувьгүй гэдгийг сануулж байсан С.Ганбаатарын дүү С.Гантуяа нэг л өдөр тус компанид төслийн менежерээр ажилладаг байсан нь ил болсон. С.Гантуяа “Оюу толгой”-н удирдлагуудыг шүүмжилж, монгол ажилтнуудыг ялгарлан гадуурхаж, бага цалин олгож, дээрэлхэж байсан талаар олон нийтэд мэдэгдсэн байдаг юм билээ. Ингээд С.Гантуяаг ажлаас нь халж, С.Ганбаатар дүүтэйгээ хамт “Оюу толгой”-н эсрэг тэмцэж эхэлсэн. Он дамжиж, шүүхээр явсны эцэст С.Гантуяаг үндэслэлгүй ажлаас нь халсныг Монголын шүүх тогтоож, нөхөн төлбөр олгуулах шийдвэр гарч байжээ. Гэхдээ С.Ганбаатар гишүүн дүү нараа “Оюу толгой”-г “онилох” ажиллагаандаа бэлтгэж, зориудаар шургуулсан ч байж болзошгүй гэх хардлага бий.

Хэрэв, С.Ганбаатар гишүүнийг “Оюу толгой” гэж орилох болгонд “захиалагч”-аас нь замбараагүй мөнгө дансанд нь орж байдаг бол яах вэ. Учир мэдэх хүмүүс “Босоо” С.Ганбаатарт “Оюу толгой”-н гэрээг эргэн харах нь чухал бус, олны анхааралд оруулах нь чухал” гэх юм билээ...