Н.Номтойбаяртай эвсэж, Саарал ордонд суугаад буй УИХ-ын гишүүн Д.Пүрэвдаваа сонгуулийн өмнөхөн “өрх” тусгаарлаж, АН-аас татгалзсан байдаг. Ерөнхийлөгч асан Х.Баттулгын зөвлөх, Баянзүрх дүүргийн Засаг дарга, НИТХ-ын Ардчилсан намын бүлгийн дарга явсан Д.Пүрэвдаваад АН-аас “урвах” олон шалтгаан байсан. Хамгийн ноцтой нь, Эрүүгийн хэрэгт шалгагдаж, төрсөн эгчтэйгээ хамтарч иргэдийг залилсан гэх Б.Төмөрмөнхийн үүсгэн байгуулсан Либерал Ардчилсан намын даргаар тэр сонгууль болохоос ердөө дөрвөн сарын өмнө томилогдсон. Хууль хүчний байгууллагынханд олдохгүй, хил давж алга болсон Б.Төмөрмөнхийн намын тамга, тэмдэг Д.Пүрэвдаваагийн халаасанд хэрхэн орсон бэ гэдгээс асуулт ургана.

Ерөнхийлөгч асан Х.Баттулга, УИХ-ын гишүүн Д.Пүрэвдаваа хоёрт зүү орохгүй шахам “нөхөрлөсөн” он жилүүд бий. Тэрбээр Х.Баттулгын зөвлөх, Ерөнхийлөгчийн хүн гэх шошгоноосоо зүгээр ч нэг салчихаагүй нь тодорхой. Саарал ордноос Х.Баттулгыг МЛАН-ыг Д.Пүрэвдаваад худалдаж авч өгсөн гэх бор шувуу “ниссээр” байгаа. Өнгөцхөн харахад, Н.Номтойбаяртай эвссэн юм шиг харагдах ч Х.Баттулгын заавраар жижиг нам худалдан авч, Төрийн ордонд төвхнөсөн байж болзошгүй гэсэн үг.

Өрсөлдөөнөөр бус хөрөнгөөр улстөрч болсон Д.Пүрэвдаваа “Үндэсний эвсэл”-ийн жагсаалтын гуравт бичигдсэн. Тэрбээр гэр бүлийн жилийн орлогоо 135 сая, өөрийнхөө орлогыг 8.6 сая төгрөг гэж мэдүүлжээ. Түүнчлэн 3.7 тэрбум төгрөгөөр үнэлэгдэх гурван орон сууц, үйлчилгээний талбай, авто гарааштай гэж мэдүүлсэн нь намдаа толгой баяны нэг болж байна. Мөн 196 сая төгрөрөөр үнэлэгдэх хоёр машин, 51 сая төгрөгийн үнэтэй мал, эзэмших, өмчлөх эрхийн дөрвөн газраа 220 сая төгрөгөөр үнэлжээ. Үүгээр зогсохгүй 80 сая төгрөгийн үнэт эдлэл, 37 саяын хадгаламжтай, бусдаас 150 сая төгрөгийн авлагатай ажээ. Дээр нь “Цэнан”, “Чин-Ачлал” ХХК, “Сонохон” цэцэрлэгийн хувьцаа эзэмшигч гэж мэдүүлсэн байна.

Д.Пүрэвдаваагийн хөрөнгө орлоготоо мэдүүлсэн дээрх компаниудыг эхнэр Нанжидын Мөнхчимэг нь хариуцан ажилладаг бөгөөд эцсийн өмчлөгчөөр нь бүртгүүлжээ. “Цэнан” ХХК нь Дотор, сэргээн засах, уламжлалт анагаах ухааны оношилгоо, эмчилгээний чиглэлээр үйл ажиллагаа явуулдаг. Ноцтой нь, уг компани нь УИХ-ын гишүүн Д.Пүрэвдавааг НИТХ дахь Ардчилсан намын бүлгийн даргаар ажиллаж байх үед нь буюу 2023 онд нийслэлийн хэд хэдэн тендерт оролцож байжээ. Үүнээс Баянзүрх дүүргийн 35 дугаар хороонд шинээр байгуулагдах Өрхийн Эрүүл мэндийн төвийг сонгон шалгаруулах 680 сая төгрөгийн төсөвтэй тендерт шалгарчээ. Уг тендерийг Нийслэлийн Засаг даргын дэргэдэх эрүүл мэндийн газраас зарласан гэдгийг тодотгож хэлэх нь зүйтэй. Өөрөөр хэлбэл, Д.Пүрэвдаваа НИТХ-ын төлөөлөгчөөр сууж, эхнэр нь Нийслэлээс зарласан тендерт компаниараа оролцож, шалгарсан гэсэн үг.

Өөр нэг хоржоонтой зүйл нь, нөхөр нь Боловсрол, эрүүл мэндийн бизнес эрхэлдэг бол эхнэр нь цэнгээний газар ажиллуулж ирсэн. Тодруулбал, Баянзүрх дүүргийн 25 дугаар хороонд уламжлалтын “Чин-Ачлал” эмнэлэг нь үйл ажиллагаа явуулж байхад замынх нь яг эсрэг талд “Бэстрейд” ХХК-ийнх нь эзэмшдэг баар, цэнгээний газар  бий. Өөрөөр хэлбэл,  Д.Пүрэвдаваа “Суусан газар бүрээсээ шороо атгадаг” нэгэн төдийгүй энэ удаад УИХ-аас юу атгахаар зэхэж суугаа бол.