Төрд гарсан ч түмэнд танигдаагүй олон гишүүн бий. Үүний нэг нь МАН-ын жагсаалтаар Төрийн ордонд заларсан УИХ-ын гишүүн М.Мандхай. МАН-ын эмэгтэйчүүд тооноор орж, цонх хагалах дуртай. Тухайлбал, Ховдын Засаг дарга асан Х.Болормаагаас эхлээд М.Мандхайгаар үргэлжилж байна. УИХ-ын гишүүн М.Мандхай ердөө жилийн өмнө төрд ажилласан туршлагагүй, худлаа хэлсэн хүнд Төрийн ордон ч орж үзээгүй нэгэн байлаа. Гэтэл нэг л өдөр Социал демократ Bонголын эмэгтэйчүүдийн холбооны Ерөнхий нарийн бичгийн даргаар томилогдож, удалгүй УИХ-ын гишүүн болсон.

УИХ-ын гишүүн М.Мандхай Их британи Улсын Олон улсын их сургуульд бизнес, санхүү менежментээр магистрын зэрэг хамгаалсан, Вэст Лондон коллежид Аялал жуулчлалын менежментээр суралцсан нэгэн. Төрд орохоосоо өмнө НҮБ-ын  хөгжлийн хөтөлбөрийн Бизнес ба хүний эрхийн төслийн зөвлөхөөр ажиллаж байсан. Мөн тэрбээр   “Сүү” ХК-ийн гүйцэтгэх захирал, “Нүүдэлчин групп” ХХК-ийн дэд захирал, Англи Улсын Шударга худалдааны агентлагт Хэрэглэгчийн зөвшөөрөл, комплаенс хариуцсан мэргэжилтнээр ажиллаж байжээ. Намтраас нь харвал өндөр боловсролтой, нэр, хүндтэй байгууллагад удирдах албан тушаал хашиж байсан нэгэн. Тэгвэл түүний Төрийн ордон руу зүтгэх шалтгаан юу байсан бэ гэдэг нь гурван жилийн дараа тодорхой болох биз ээ.

УИХ-ын гишүүн М.Мандхай Увс аймгийн Сагил сумын гаралтай нэгэн. Саяхан сумынхаа 100 жилийн ойд 10 сая төгрөг хандивлаж байлаа. Ийм ч учраас ирэх зун М.Мандхай гишүүн Сагил сумын наадмын төв асарын хойморт залрах нь тодорхой биз ээ. Сонирхуулахад, түүний аав Цэрэлийн Мэндбаяр нь Хот төлөвлөлтийн зөвлөх архитектороор ажиллаж байсан нэгэн. Архитектор Ц.Мэндбаярыг Монгол Улсын дөрвөн цэгт байрлуулсан Соёмбот баганыг урласан нэгэн гэвэл монголчууд эчнээ танина. Харин ээж Б.Болор нь "Монгол костюмс" ХХК-ийн үүсгэн байгуулагч, СГЗ Б.Сувдын дүү, “Мөнгөтэй зочин” нэвтрүүлгийн хөтлөгч Б.Баярын эгч. Удам угсаагаар нь хөөвөл ийм байна. Харин улс төрийн дэмжлэг нь УИХ-ын дарга Д.Амарбаясгалан. Тодруулбал, УИХ-ын дарга УИХ-ын гишүүн М.Мандхай, Х.Булгантуяа, А.Ариунзаяа нарыг улс төрд бэлтгэж, хөтөлсөн гэдгийг улс төрийн хүрээллийнхэн гэрчилдэг билээ.

УИХ-ын гишүүн М.Мандхай Төрийн ордонд төвхсөнөөсөө хойш УИХ-ын даргыг “мануухай” шиг дагаж байгаа нэгэн. Хоёрдугаар тойргийг, тэр дундаа Говь-Алтай аймагт хэдэнтээ очиж, УИХ-ын даргын тойргийн сонгогчидтой уулзах нэрээр явсан газар бүрд нь  дагаж, намирч байгаа гэхэд хилсдэхгүй. Түүнчлэн тэрбээр дараагийн дөрвөн жилд Увс, Говь-Алтай, Завхан, Ховд аймгаас нэр дэвшихээр эртнээс бэлдэж байж болзошгүй. Тойргоо усалж, Увс нутгийн охин шүү гэдэг мессежийг ил далд өгч байгаа гэсэн үг.

УИХ-ын гишүүн М.Мандхай жилийн орлогоо 41 сая, гэр бүлийн орлогоо 48 сая төгрөг гэж мэдүүлжээ. Мөн тэрбээр 360 сая төгрөгөөр үнэлэгдэх орон сууц, зуслангийн байшинтай, 106 сая төгрөгийн үнэлгээтэй хоёр машинтай, хурдан удмын дөрвөн адуутай гэжээ. Түүнчлэн 90 сая төгрөгийн үнэт эдлэлтэй, тэг төгрөгийн хадгаламжтай, 20 сая төгрөгийн нэг газартай, 175 сая төгрөгийн зээлтэй гэж хөрөнгө орлогоо мэдүүлсэн байна. 

Эцэст нь,  М.Мандхай УИХ-ын даргын кнопны гишүүн гэдгийг дээр дурдлаа. Тэгэхээр  ирэх дөрвөн жилдээ лав УИХ-ын даргын “харц”-аар хөдөлж, үйл хэргийг нь хамжиж гүйцээхээс өөр ажил хийхгүй нь тодорхой боллоо.