Зон олны намын дарга Э.Одбаяр Ерөнхийлөгчийг огцруулахыг шаардаж мэдэгдэл хийлээ. Тэрбээр  Ардчилсан намын дарга асан С.Эрдэнийн хүү юм.

Ерөнхийлөгчийг  огцруулах шаардлагын талаар Э.Одбаяр "Ерөнхийлөгч Х.Баттулга 2019 онд Шүүгчийн эрх зүйн байдлыг дордуулах хууль санаачилж, ҮАБЗ-д эрх мэдлийг хэт төвлөрүүлсэн ажиллагаа явуулсан. Энэ нь Үндсэн хууль зөрчсөн. Энэ талаар би Үндсэн хуулийн цэцэд хандаж байсан ч хариу ирээгүй байна. ҮАБЗ-д эрх мэдлийг хэт төвлөрүүлснээр шүүгчийн эрх мэдэлд нөлөөлөх, шүүхийн эрх зүйн байдлыг дордуулах үйл ажиллагаа болсон. Тиймээс Цэцэд хандсан асуудлыг яаралтай хэлэлцэхийг шаардаж байна. Мөн нэгдүгээр сарын 20-нд иргэдийн жагсаал болсон. Энэ үеэр Х.Баттулгыг оролцсон гэдгийг яаралтай шалгаж, тогтоох шаардлагатай байна. Учир нь, тухайн цуглааны үеэр УИХ-ын гишүүн Ц.Туваан нарын гишүүн жагсаалд оролцож, иргэдийг турхирсан" хэмээн ярилаа.