УИХ-ын чуулганы нэгдсэн хуралдаан үргэлжилж байна. Чуулганы хуралдаанаар "Монгол Улсын хууль тогтоомжийг 2024 он хүртэл боловсронгуй болгох үндсэн чиглэл батлах тухай” УИХ-ын тогтоолын төслийн анхны хэлэлцүүлгийг хийж байгаа билээ. Тогтоолын төсөлтэй холбоотой гишүүд асуулт асууж, хариулт авч байна.

УИХ-ЫН ГИШҮҮН Ц.ДАВААСҮРЭН: Хууль санаачлахад маш төвөгтэй болчихсон байна. Тухайлбал, Төр, нийтийн өмчтэй холбоотой заалтад асуудал байна. Төрийн болон орон нутгийн өмчийн тухай хуулиараа энэ өмчийг гадаадын иргэн, Монгол Улсын харьяалалгүй хүн ашиглаж эзэмшихээр хууль эрх зүйн орчин бүрдсэн. Тэгэхээр төр, нийтийн гэдэг хоёр үгийг авчихмаар байгаа юм. Хуулийн төсөл санаачлахаар доод тал нь хоёр сар болно. Энэ талаар Их хурлын даргад хандсан. Өнөөдөр манай хамгийн том хөрөнгө оруулагч Оюутолгойг эзэмшигч   Монгол Улсын алтыг барьцаалж, гадаадаас хоёр дахь шатны зээл авах тухай асуудлыг ярьж байна. Гаднын иргэн, гадаадын компани Монголын баялгийг барьцаалж зээл авах тухай яригдаж байна гэхээр хууль, эрх зүйн орчин нь маш сайн байна гэсэн үг. Манайд ийм эрх зүйн орчин байна уу. Цаашдаа Арбитр дээр маргаан болоход ийм хууль эрх зүйн орчин Монголд байна гээд асуудал үүсвэл яах вэ.  

УИХ-ЫН ГИШҮҮН С.БЯМБАЦОГТ: Бид өөрсдөө хуулиа мэддэг баймаар байна. Өмчийг захиран зарцуулах гурван хэлбэр байгаа. Эзэмших, ашиглах, өмчлөх. Өнөөдөр Монгол Улсын байгалийн баялгийг гаднын иргэн өмчлөхгүй. Цаашдаа ч өмчлөхгүй. Урьд нь гадаадын иргэн, хуулийн этгээд хөрөнгийг эзэмшдэг, ашигладаг байсан жишиг хэвээр явна.