УИХ-ын чуулганы үдээс хойших хуралдаанаар Шүүхийн тухай хуулийг дагаж, хамт өргөн мэдүүлсэн хуулийн төслүүдийг хэлэлцэж эхэллээ. Хуулийн төсөлтэй холбоотой гишүүд асуулт асууж, үг хэлж байна.

УИХ-ЫН ГИШҮҮН Д.ТОГТОХСҮРЭН: Шүүгчдийн ачаалал их байна гээд байгаа юм. Бид цалинг нь нэмлээ гээд ачааллыг нь шийдэж чадахгүй шүү дээ. Орон тоог нэмэгдүүлэх хэрэгтэй байна. Шинэ хуулийн үзэл баримтлалаар давж заалдах шатны шүүх ачаалалтай болж, Дээд шатны шүүхийн ачаалал буурч байгаа. Мөн нийслэл, дүүрэгт эрүү, иргэний хэргийн ачаалал их байгаа талаар судалгаа гарсан байна лээ. Нэг шүүгчид ногдох норм, нормативыг гаргаад шүүхийн орон тоог цэглэж, 2022 оны төсөв хэлэлцэх үеэр асуудлыг шийдмээр байна. Ачаалал өндөр байна гэдэг нь асуудал үүснэ гэсэн үг.

УИХ-ЫН ГИШҮҮН С.БЯМБАЦОГТ: ШЕЗ-өөс судалгаа гаргаж, иргэний хэрэг, дээд шүүхэд ачаалалтай байгааг тогтоосон. Энэ хуулийн өөрчлөлтөөр Дээд шүүхийн ачааллыг багасгаж байгаа. Бусад шүүхийн асуудлыг шийдэж чадаагүй. Шүүх байгуулах тухай хууль ирэх хавар батална. Энэ үед тооцоо судалгаа хийж шийдэх бололцоотой гэж харж байгаа. Шүүхийн эдийн засгийн баталгааг төр хангана гэсэн үүрэгтэй. Үүний дагуу Засгийн газар, УИХ-д хийх ажил бий. Судалгаагаар сүүлийн 10-аад жил шүүхийн төсөв нэмэгдээгүй, хөрөнгө оруулалт хийгдээгүй гэсэн. Үүнийг тогтоолын хүрээнд шийднэ. Цалин хөлс нэмэгдээгүй шүү.