Тухайн үед Ерөнхий сайд У.Хүрэлсүх “...30 гэр бүлийн нэг нь нөхөр Н.Номтойбаяр та мөн шүү. Зөвхөн МАК компани гэхэд 36 лиценз эзэмшдэг. “Цагаан суварга” танай гэр бүлийн өмч биш. Та нар хууль бусаар баяжсан. Төрийн эрх ард түмний гарт байдаг. Чи үнэхээр эх орондоо хайртай юм бол “Цагаан суварга”-аа Монголын ард түмэнд буцаагаад өгчих..” хэмээх УИХ-ын гишүүн асан Н.Номтойбаяр хоёрын маргаанаас энэ орд газрыг Монголын төр мэдэлдээ өнөө маргаашгүй авах нь сэжүүр үүссэн гэж болно. Гэвч У.Хүрэлсүх Б.Нямтайширыг өнөө хүртэл давж чадахгүй байгаа бололтой. Учир нь, “Цагаан суварга”-ын орд өнөөдрийг хүртэл 100 хувь МАК-ийн мэдэлд байна.

Зарим эх сурвалж ““Цагаан суварга”-ын ордтой холбоотой асуудлаар айлгах гэж Н.Номтойбаярыг шалгуулж эхлээд, дийлэхгүй “явуулчихсан”. Нөгөөх нь яаж ч үзээд найраанд нь ороогүй бололтой” хэмээн хэвлэлээр ярьж байсан.

Дорнод аймгийн Мандах сумын нутаг дэвсгэрт байрлах 250.4 сая тонн хүдэр, 1.8 сая тонн зэс, 66.1 сая тонн молибден, 11.2 тонн алтны  нөөц бүхий уг ордыг анх 1950-иад оноос улсын төсвийн хөрөнгөөр хайгуул хийж эхэлсэн. Гэвч ашиглалтын нөөцийг баталгаажуулаагүй зэрэг дутуу ажил нэлээд үлдсэнийг нь хожим Б.Нямтайшир овжиноор ашиглаж, “хөрөнгө”-гүй Монгол Улс байгалийн баялгаа нэг хүний мэдэлд өгсөн байдаг. Нэг ёсондоо 2014 онд УИХ-ын хаврын чуулганаар энэхүү ордыг ашиглах тухай хэлэлцээд, МАК 100 уг ордыг эзэмшихээр болсон байдаг. Тухайн үед МАК-ын захирал Б.Нямтайшир “Хэрвээ Монголын төр энэ хувиа эзэмшинэ гэвэл баяжуулах үйлдвэр барихад шаардагдаад байгаа 1.2 тэрбум ам.доллараас 350 сая ам.долларыг нь гаргаж өгөөд 34 хувиа эзэмших хэрэгтэй. Чадахгүй бол Цагаан суваргын ордын лицензийг эзэмшиж байгаагийн хувьд бид гадаадын улс орнуудаас хөрөнгө оруулалт татаж, гаднынхантай хамтрахаас өөр замгүй” гэж байв. Тухайн үед Засгийн газар яаж ч чадаагүй бөгөөд өдгөө ч яаж ч чадахгүй л сууна.