Монголын эдийн засгийн чуулган-Бүсчилсэн хөгжлийн форумыг энэ сарын 1,2-нд зохион байгуулж байна. Уг арга хэмжэээг нээж Ерөнхий сайд Л.Оюун-Эрдэнэ үг хэллээ.

Тэрбээр "Эдийн засгийн форумыг зохион байгуулсаар ирсэн хүмүүст баяр хүргэе. Ардчилал бол төгс зүй биш. Маргаан мэтгэлцээн дунд явж, ярвигтай замыг туулдаг. Парламентын засаглал түүнээс ярвигтай. Энэ бол иргэдийн төлөөлөх эрхийн мандат. Ардчилсан нийгмийн давуу тал алдаагаа засахад оршиж байна. Өнөөдөр бидний гаргасан шийдвэр маргааш дүгнэгдэнэ. Өчигдрийн зүйл өнөөдөр дүгнэгдэнэ. Саяхан болж өнгөрсөн дэлхийн эдийн засгийн форум дээр яригдсан гол асуудал нь дэлхий хуваагдмал болж байна. Үүнийг цар тахал хурдасгасан. Цар тахлын өмнөх үеийн дэлхийд буцах тухай, дэлхий нийтэд тулгамдаж байгаа цаг уур, үер ус, цаг уурын дулаарлыг НҮБ дээр ярихад хол байна гэж төсөөлдөг тухай ярьсан. Гэтэл 10-20 жилийн дараа Шевцарьт цас орохгүй болох тухай ярьж, түүнд хүмүүс санаа зовж байгааг хэлэлцүүлсэн. Мөн хиймэл оюун ухаан хөгжиж байна. Дэлхийн том гүрнүүдийн сөргөлдөөнийг дэлхий дийлэхгүй болох хүрч байгааг эрдэмтэн судлаачид ярьж эхэлжээ. Шийдвэр гаргагч нарын сонгууль хэрхэн нөлөөлж, энэ нь дэлхийн эдийн засаг, энх тайванд хэрхэн нөлөөлөх тухай ярилцсан. Улмаар хүн төрөлхтөн дэлхийн II дайнаас хойш хамгийн хүчтэй сорилттой тулгарсан тухай дүгнэлтэд хүрсэн. Социалист систем нурж байх цаг үед манай бүс нтугийн олон улс өөр өөрийн хөгжлийн замаа сонгосон. Энэ цаг үед Монгол Улс парламентын замаа сонгож, ардчилсан хөгжлийн замаар замнаж, Үндсэн хуулиа баталсан.

Өнөөдөр бид 30 жилийн алдаа оноог хэлэлцэж, тогтолцооны реформыг хамтдаа эхлүүлж, ирэх 30 жилийн үндэс суурийг тавьж байна. 30 жилийн дараа шинэ үеийнхэн цуглаж, ирээдүйгээ тодорхойлох үед бидний энэ үеийг Монгол Улсын эрчимжсэн хөгжлийн гарааг эхлүүлж, хот хөдөөгийн хөгжлийн тэнцвэрийг бүрэн шийдвэрлэсэн хэмээн дүгнээсэй гэж хүсэж байна. Та бид 30 жилийн дараа дахин нэг хоосон мөрөөдөл болж үлдээхгүйн төлөө, тогтолцооны реформыг тууштай хэрэгжүүлж, үр дүнг нь бодитоор үзэхийн төлөө чин эрмэлзэл, эр зориг, хүсэл мөрөөдлөө нэгтгэх цаг болжээ. Энэ бол ирээдүй үедээ эрүүл нийгмийг үлдээх үзэл санаа, үйл хэргийн тэмцэл юм. Бүсчилсэн хөгжлийн бодлогыг хэрэгжүүлсний үр дүнд хөдөөгөөс хот руу биш, харин хотоос хөдөөг зорьсон их нүүдэл эхэлнэ гэдэгт итгэлтэй байна" гэлээ.