Шүүхийн тухай хуулийг Хууль зүйн байнгын хороогоор хэлэлцэж байна. Хуулийн төсөлтэй холбоотой Байнгын хорооны гишүүд асуулт асуух үеэр УИХ-ын гишүүн Ш.Адъшаа "Дээд шүүхийг шүдгүй арслан мэтээр үзэж, хуулийн зүйл заалт оруулжээ. Бүх хэрэг маргааныг анхан болон дунд шатны шүүхээр шийдвэрлүүлж байна. Энэ нь ач холбогдолтой боловч авилга, албан тушаал болон байгаль орчинд хор хөнөөл учруулсан хэргийг Дээд шүүхээр шийдвэрлүүлэх ёстой" гэсэн юм. 

Харин ажлын хэсгийн ахлагч УИХ-ын гишүүн Б.Энхбаяр "Шүүхийн шинэчлэлийн гол амин сүнс Дээд шүүх дээр явж байна. Учир нь, манай улсын бүх хэргийг Дээд шүүхэд шийдвэрлэдэг байх уу гэдгийг энэ хуулиар шийдэх гэж байгаа юм. Дээд шүүх амьгүй албат байна уу гэдэг нь одоогийн шүүгч нартай холбоотой. Яагаад бүх хэрэг маргааныг тэд шийдвэрлэх гээд байдаг юм. Хамаг хэрэг нь Дээд шүүх дээр овоорчихсон, анхан дунд шатны шүүхээс гарсан шийдвэр Дээд шүүхээр ороод өөрчлөгддөг. Даахгүй нохой булуу хураана гэгчээр шүүгч нар нь эрх мэдлээсээ хөндийрч чадахгүй гэж амь тэмцэж байгаа юм. Манай шүүх өөрөө маш хүнд сурталтай" байна гэсэн тайлбар өглөө.

УИХ-ын гишүүн Ш.Адъшаа "Энхбаяраа ингэж худлаа онол ярихаа боль. Дээд шүүхийнхэн лобби хийгээд байсан зүйлгүй шүү. Дэд ажлын хэсгийн хуралдаан дээр Дээд шүүхийн шүүгч нарыг хөөж явуулаа биз дээ. Яагаад тэд үгээ хэлж болдоггүй юм бэ" хэмээлээ.