Шүүхийн тухай хуулийн шинэчилсэн найруулгын төслийг хэлэлцэж байгаатай холбогдуулан гишүүд асуулт асууж байна. УИХ-ын гишүүн Б.Энх-Амгалан хуулийн төсөлд дэвшилттэй заалтууд орсныг онцоллоо. Тэрбээр "Нийт шүүх, шүүхийн хуралдааныг зохион байгуулагчаа томилохгүй, сонгох боломжтой болсон байна. Шүүх хуралдаан даргалагчаа дотроосоо сонгоод тооллогын комиссоо дотроосоо сонгох шалгууртай болжээ. Мөн ерөнхий зөвлөл, сахилгын хорооны бүрэлдэхүүнд орох шүүгчээ сонгох эрхийг нээж өгсөн байна. Үүнээс тодруулах зүйл нь шүүхийн тайлбар, шүүхийн шаардлага гэсэн нэр томьёог ойлгож байна. Шүүхийн татгалзал гэснийг ойлгохгүй байна" гэв.

Улсын дээд шүүхийн шүүгч Ц.Цогт "Шүүх хуралдаанд томилогдсон шүүгч, бүрэлдэхүүнд томилогдсон шүүгч хуульд зааснаар тухайн хэргийг шийдвэрлэж болохгүй, хэргийн оролцогчтой холбоо хамаарал бүхий этгээдтэй байдаг. Үүнийг татгалзан гарах гэж хэлдэг учраас шүүхийн татгалзал гэж томьёолсон байх. Мөн нийт шүүгчдийн хуралдаанаар хууль тогтоомжийг сайжруулах талаар саналаа гаргах заалт оруулж өгсөн байгаа. Шүүгч нарын өдөр тутмын шүүх ажиллагаанд хэрэглэгддэг процессын хуулиуд гэж байдаг. Энэ хуулиудыг хэрэглэхэд төвөгтэй нэмэлт, өөрчлөлт оруулах тохиолдол гардаг. Гэтэл шүүгч нар хууль санаачлах эрхгүй. Тиймээс саналаа нэгтгэж, Дээд шүүхэд санал гаргаж, цааш уламжлах зохицуулалт байгаа" хэмээн хариулав.