Хууль зүйн байнгын хорооны хуралдаанаар Шүүхийн тухай хуулийн шинэчилсэн найруулгын төслийг хэлэлцэж байна. 

 

Энэ үеэр Улсын дээд шүүхийн шүүгч Л.Атарцэцэг шүүгчийн хараат бус байдал, шүүгчийн бие даасан байдлыг хангахад эдийн засгийн асуудал чухал гэдгийг хэллээ. Тэрбээр "Монгол Улын шүүхийн байгууллагад 518 шүүгч ажиллаж байна. Уг нь 699 хүн ажиллах орон тоотой. Өнөөдрийн байдлаар нэг шүүгчид ногдох хэргийн ачаалал их байдаг. Уг нь нэг шүүгч иргэний 200, эрүүгийн 72, захиргааны 42 хэргийг шийдвэрлэх  ёстой. Гэтэл өнөөдөр нэг шүүгч иргэний 400 гаруй, эрүүгийн 100 гаруй,  захиргааны 70 гаруй хэрэг шийдэж байна. Цалингийн сан сүүлийн жилд нэмэгдсэн. Энэ нь УИХ-ын тогтоолын дагуу шүүгчийн орон тоог нэмэгдүүлж, 20 шүүгч нэмж ажиллуулж байгаатай холбоотой. Цаашид энэ орон тоог нөхөх 10 сул орон тоо бий" гэв.

 

Үргэлжлүүлэн УИХ-ын гишүүн Б.Энхбаяр "Хуулийн төсөл боловсруулж байх явцад шүүгчдийн цалинг судалж үзсэн. Энэ хуулийн төсөлд урсгал зардал бууруулахгүй гэсэн заалт оруулсан. Өөрөөр хэлбэл цалин, орон тоог нь бууруулахгүй гэсэн санаатай.  Шүүгчийн цалин маш өндөр гэсэн ойлголт байдаг.  Гэтэл анхан шатны шүүгчийн цалин 2.7 сая, давж заалдах шатных гурван сая юм билээ. 5-6 сая төгрөгийн цалинтай хүмүүс нь Дээд шүүхийнх юм байна. Үүнийг залруулна. Цаашид шүүгчийн нарийн бичиг, туслахуудынх нь цалинг нэмэх шаардлагатай" гэлээ.