Нийслэлчүүд хүчилтөрөгчөөр биш, хүхрийн хийгээр амьсгалж нийтээрээ архаг хордлогод ороод буй. Угаараас үүдэлтэй уушгины өвчлөл чимээгүй тахал болж Үндэсний аюулгүй байдлын хэмжээнд хүрсэн билээ.

    Тэгвэл Нийслэлийн ардчилсан нам мэргэжлийн багтай хамтран “Тавантолгой түлш” ХХК-ийн сайжруулсан шахмал түлшний баруун үйлдвэрлэлийн нөхцөл байдалтай танилцаж, түлшинд агуулагдах хорт бодисын талаар асуулга тавьж, гурван төрлийн түүхий эд, бүтээгдэхүүнээс дээж авч шинжилгээнд өгөх ажлыг эхлүүллээ.

   Тодруулбал, утаанаас ялгарах хүхрийн хийгээр амьсгалсан иргэд олноороо хордлогод орж, зарим нь гэр бүлээрээ угаартаж нас барж байгаа тохиолдлуудад нийгмээрээ хариулт нэхэж, түлшний чанарыг бодитоор тогтоохыг шаардаж буй. Тиймээс сайжруулсан шахмал түлшний завсрын бүтээгдэхүүн болох мидлинг,  Монгол эрдэмтдийн гарган авсан барьцалдуулагч, БНХАУ-аас импортолсон барьцалдуулагч тус бүрээс дээж авчээ.

   Энэ үеэр НИТХ-ын төлөөлөгч бөгөөд Нийслэлийн Ардчилсан намын дарга Т.Батцогт “Хамгийн сайн лаборатори хүн өөрөө. Өнөөдөр бид дарга нарын танилцуулж байгаа танилцуулгад итгэхгүй. Хүнээ бодсон, нийгмээ бодсон, олон улсын стандартыг баримталдаг тэр улсад  та нарын хоргүй гээд байгаа түлшний дээжүүдээс чинь авч шинжлүүлнэ. Эрх баригчид утааг яллаа гэж сонгуулийн шоу хийж байсан цаг саяхан. Гэтэл өнөөдөр  таван жилийн дараах уушгины хавдрын суурийг тавьсныхаа төлөө компанийн ТУЗ-ийн дарга нар өөрсдийгөө 1.1 тэрбум төгрөгөөр урамшуулж байх жишээтэй. Сануулахад уушги худлаа ярихгүй гэдэг үгийг эргүүлээд тэр дарга нарт хэлчихье ” хэмээв.

    Эрх баригч МАН-ын дарга нарын санаачилж үйлдвэрлэсэн сайжруулсан нэртэй шахмал түлш сүүлийн дөрвөн жилийн турш нийслэлийн гэр хорооллын 198 мянган айл өрхөд хүрсэн. Статистикаас харвал гэртээ угаартаж нас барсан хүний  тоо 2020 онд 124, 2021 онд 184, 2022 онд 122 байгаа бол өнгөрсөн оны байдлаар угаартсан хүний тоо 3184 болж, 61 хүн нас барсан харамсалтай мэдээ байна.

    Ноцтой нь түлшнээс ялгарах хүхэрлэг хий, түүхий нүүрснийхээс хоёр дахин их байгааг “Тавантолгой түлш” ХХК-ийн үйлдвэрлэлийн технологич танилцуулга хийх үеэрээ дурджээ.

     Одоогийн байдлаар ТТТ ХХК-ийн хуримтлагдсан алдагдал 687 тэрбум төгрөг бөгөөд өнгөрсөн таван жилийн хугацаанд 2.5 их наяд төгрөгийг сайжруулсан шахмал түлш үйлдвэрлэхэд зарцуулсан аж.

    Улаанбаатар хотын агаарыг бохирдуулагч хүчин зүйлсийн 51 хувийг сайжруулсан шахмал түлшнээс ялгарах хорт бодис дангаараа эзэлдэг гэсэн мэргэжлийн байгууллагын судалгааны дүнг ч мөн тэд  хүлээн зөвшөөрч хорт бодисын хэмжээг тогтоох лаборатори харамсалтай нь, манай улсад байдаггүй гэдгийг онцлон хөнджээ.

Эцэст нь, эрх баригчид сүүлийн дөрвөн жилийн хугацаанд нүүрсний хорыг сайжруулж, гэр хорооллын айл өрхүүдэд шахсан нь бодит болж дараагийн шатанд хагас коксожсон түлш үйлдвэрлэхээр зэхэж байгаа. Угтаа МАН-д эрх барьсан сүүлийн найман жилийн хугацаанд нийслэлийн гэр хорооллын 220 мянган янданг буулгах шийдэл байсангүй. Харин ч уушгины хавдрын суурь өвчлөлийг тэд тавьж чадлаа. Түлшээр бизнес хийж, зах зээлээ алдахгүй байх бодлогыг л тэд үргэлжлүүлэх гэж байгаа нь бодит үнэн гэдгийг Нийслэлийн Ардчилсан нам сануулав.