2021. 01.27

2021 ОН: Л.ОЮУН-ЭРДЭНЭ МОНГОЛ УЛСЫН 32 ДАХЬ ЕРӨНХИЙ САЙДААР ТОМИЛОГДЛОО

УИХ-ын гишүүн, ЗГХЭГ-ын дарга Л.Оюун-Эрдэнийг парламентын гишүүдийн 87.9 хувийн саналаар Монгол Улсын 32 дахь Ерөнхий сайдаар томилов. Ингэснээр тэрбээр Монгол Улсын хамгийн залуу Ерөнхий сайд нарын нэг болов.

2021.06.25

МОНГОЛ АРДЫН НАМЫН ДАРГААР СОНГОГДЛОО

Монгол Ардын Намын XXX Их хуралд оролцсон нийт төлөөлөгчдийн 99.7 хувь нь Л.Оюун-Эрдэнийг МАН-ын даргад дэмжив. Тэрбээр 2009 онд МАН-ын Удирдах Зөвлөлийн Хэрэг эрхлэх газрын дарга, 2010-2014 онд Нийгмийн Ардчилал, Монголын Залуучуудын холбооны Ерөнхийлөгч, 2011 он МАН-ын Нарийн бичгийн дарга, 2012 онд МАН-ын Ерөнхий нарийн бичгийн даргын үүрэг гүйцэтгэгчээр ажиллаж байсан.

2021.02.17                                                      

 “ЭРҮҮЛ МЭНДЭЭ ХАМГААЛЖ, ЭДИЙН ЗАСГАА СЭРГЭЭХ 10 ИХ НАЯДЫН ЦОГЦ ТӨЛӨВЛӨГӨӨ”-Г ЭХЛҮҮЛЭВ

Дэлхий дахинд “Ковид-19” дэгдсэний улмаас Монгол Улсын эдийн засаг 2019 онд 5.2 хувийн өсөлттэй байсан ч 2020 онд 4.6 хувийн бууралттай гарав. Засгийн газар иргэдийнхээ эрүүл мэндийг хамгаалж, эдийн засгаа сэргээх бодлого, зорилтыг 2023 он хүртэл хэрэгжүүлэхээ Ерөнхий сайд зарласан юм.

2021.05.31

ВАКЦИНЖУУЛАЛТЫГ АМЖИЛТТАЙ ЗОХИОН БАЙГУУЛЖ, МОНГОЛ УЛС ХИЛЭЭ НЭЭЛЭЭ

Монгол Улс цар тахлыг хоихрол багатай даван туулах хамгийн гол арга зам болох иргэдийг дархлаажуулах ажлыг 2021 оны хоёрдугаар сарын 13-нд орон даяар эхлүүлснээс хойш жилийн дараа гамшгийн шар түвшинд шилжиж, олон улсад хилээ нээв. 2022 оны арванхоёр дугаар сарын 31-ний байдлаар Монгол Улсын нийт хүн амын 67 хувь нь коронавирусийн эсрэг вакцины бүрэн тунд хамрагдаад байна

2021.12.30

 “ШИНЭ СЭРГЭЛТИЙН БОДЛОГО”

Цар тахлын үед Монгол Улсын эдийн засаг 1992 оноос хойш хоёр дахь удаагаа 4.6 хувь хүртэл агшсан. Тиймээс Ерөнхий сайд Л.Оюун-Эрдэнэ “Шинэ сэргэлтийн бодлого”-ыг санаачилж, 2021 оны арванхоёрдугаар сарын 30-нд УИХ-аар батлуулав. “Шинэ сэргэлтийн бодлого” нь “Алсын хараа-2050” Монгол Улсын урт хугацааны хөгжлийн бодлогыг хэрэгжүүлэхэд саад болж буй хязгаарлагч зургаан хүчин зүйлийг 10 жилийн хугацаанд бууруулахад чиглэж байна.

2022.01.25

2022 ОН: “ОЮУ ТОЛГОЙ”-Н ӨРИЙГ ТЭГЛЭЖ, ТӨСЛИЙГ “АМЬ ОРУУЛАВ”

Л.Оюун-Эрдэнийн Засгийн газар “Оюу толгой”-н хөрөнгө оруулагч талтай амжилттай хэлэлцээ хийж, Монгол Улсын Засгийн газрын эзэмшлийн 34 хувьд ногдох 2.3 тэрбум ам.долларын өрийг 100 хувь тэглүүллээ. Ингэснээр өмнө нь тооцоолж байсан 22 тэрбум ам.долларын өр цаашид үүсэхгүй. Мөн Засгийн газрын “Шинэ сэргэлтийн бодлого”-ын нэг хэсэг Аж үйлдвэрийн сэргэлтийн хүрээнд “Оюу толгой”-н гүний уурхайн бүтээн байгуулалтыг 2022 оны нэгдүгээр сарын 25-нд талууд амжилттай эхлүүллээ.

2022.04.10

ДИЗЕЛЬ ТҮЛШНИЙ ОНЦГОЙ АЛБАН ТАТВАРЫГ ТЭГЛЭЛЭЭ

Уул уурхай, газар тариалан, бүтээн байгуулалтын бэлтгэл эхлэх үед дизель түлшний үнийг өнөөгийн түвшинд тогтвортой хадгалах, хангамжийг тогтвортой байлгах хүрээнд дизель түлшний онцгой албан татварын хэмжээг 2022 оны долдугаар сарын 1 хүртэл тэглэв.

2022.09.08

 ЭГИЙН ГОЛЫН УЦС ГАЦААНААС ГАРЧ, ШАТАХУУНЫГ УРТ ХУГАЦААНД ТОГТВОРТОЙ ҮНЭЭР АВАХААР БОЛОВ

Манай улс ОХУ-ын Роснефть компанитай хэлэлцээ хийж, 1285 ам.долларт хүрээд байсан АИ-92 шатахууны үнийг 830 ам.доллар болгон бууруулж, энэ үнийг 2022 он дуустал тогтвортой хадгалахаар болж байсан. Түүнчлэн тэрбээр ОХУ-ын Дорнын эдийн засгийн чуулганд оролцох үеэрээ ОХУ-ын Ерөнхийлөгч В.В.Путинтэй дахин хэлэлцээ хийж, АИ-92 шатахууныг 2027 он хүртэл тогтвортой үнээр, дизель түлшийг 10 хувийн тогтвор үнээр авч байхаар тохиролцсон.