Байгаль орчин, хүнс хөдөө аж ахуйн байнгын хорооноос мэдээлэл өглөө. Энэ үеэр тус хорооноос намрын чуулганаар нийт 23 хууль эцэслэн баталжээ. Холбогдох хуулийн талаар ажлын хэсэг ахалсан гишүүд мэдээлэл хийлээ.

            УИХ-ын гишүүн Ж.Бат-Эрдэнэ “Мал, амьтны эрүүл мэндийн тухай хуульд нэмэлт өөрчлөлт оруулах, амьтан, ургамал тэдгээрийн гаралтай түүхий эдийг улсын хилээр нэвтрүүлэх буюу хорио цээрийн хяналт шалгалтын тухай хуульд нэмэлт өөрчлөлт оруулах Ажлын хэсгийг ахалж ажилласан.Мэргэжлийн хяналтын ерөнхий газар татан буугдсан. Үүнтэй холбоотойгоор мал амьтны эрүүл мэндтэй холбоотой асуудал, ургамал, амьтан, түүнээс гарсан бүтээгдэхүүнд хяналтыг сайжруулах хуулийн өөрчлөлтийг тусгасан. Хорио цээртэй холбоотой асуудал дээр урьд өмнө нь хил гаалиар орж гарч байгаа бүтээгдэхүүнтэй холбоотой гэрчилгээ өгдөг байсан. Энэ гэрчилгээг Хөдөө аж ахуйн яам олгохоор заасан.  Хуулийн гол асуудал нь олон улсын худалдааны чөлөөт байдлыг бий болгох, малын эрүүл мэндтэй холбоотой асуудлыг зохицуулах, олон улсын мал амьтны эрүүл мэндийн байгууллагын уялдаа холбоог сайжруулах, хамгаалагдсан аж ахуйг сайжруулах зүйл бий” гэв.

          Харин УИХ-ын гишүүн Б.Баттөмөр "Миний бие Органик бүтээгдэхүүн хуулийн төслийг УИХ-л ажлын хэсгийг нь ахалсан. Тус хууль анх 2016 онд батлагдсан байдаг. Хуучин хуулийг орчин үед тавигдах шаардлагатай уялдуулах шаардлага гарсан учир хуулийг шинэчилж гаргасан юм. Ер нь дэлхийд нийт бүтээгдэхүүний найман хувийг органик бүтээгдэхүүн эзэлж байна. Уул уурхайтай өрсөлдөх том салбар бол Хөдөө аж ахуй. Тиймээс органик бүтээгдэхүүнийг үйлдвэрлэсэн тохиолдолд асар их эрэлт хэрэгцээ бол байна. Тиймээс энэ хууль онцгой ач холбогдолтой. Төрөөс нэгдүгээрт, органик бүтээгдэхүүн үйлдвэрлэсэн тохиолдолд Аж ахуйн нэгжийн орлогын 90 хувигй эхний таван жил 100 хувь чөлөөлнө. Дараагийн гурван жилийн хугацаанд 50 хувь чөлөөлөх байгаа. Дээрээс нь эх орондоо хүнсний бүтээгдэхүүн үйлдвэрлэх хөтөлбөрийн дагуу олгогдож байгаа зээлээс авах боломжтой. Экспортод бүтээгдэхүүнээ гаргасан тохиолдолд банкны хүүгийн 50 хувийг зээлийн батлан даалтын сангаар дамжуулж шийдэж өгье гэж байгаа" гэв.