УИХ-ын нэгдсэн чуулган хуралдаж байна. Энэ үеэр УИХ-ын гишүүн Ж.Батсуурь үг хэллээ.

                Тэрбээр “Намрын чуулган өндөрлөх гэж байна. Чуулгах өндөрлөх өдөр УИХ-ын олон тогтоол орж ирлээ. Яг үнэндээ 2016 онд өнөөгийн эрх баригчид маш олон зүйл амлаж гарч ирсэн. Долларын ханшийг барина, утаагүй, түгжрэлгүй болгоно. Усан, дүүжин тээвэр ашиглана. Мөн төрийн өмчийн компанийг задална, хувьцаа өгнө, авлига бууруулна гэж амласнаас хойш нэг мэдэхэд найман жил өнгөрсөн байна. Одоо харахад бүх зүйл урвуугаар эргэсэн. Энэ олон тогтоолоороо хавар ард түмнийг шилний цаанаас чихэр долоолгох гэж байна. Бид дэлхийн нийтийн жишгийг дагах хэрэгтэй. Гэтэл эрх баригчид өнгөрсөн найман жилийн турш төрийн өмчийг томруулсан. Томруулах тусам нь авлигал нэмэгдсэн. Би хэдэн зүйл асуумаар байна. “Эрдэнэ Тавантолгой байгуулагдсан цагаасаа хойш яг хэдэн их наядын орлого олсон бэ. Мөн хэдэн их наядын ашигтай ажилласан бэ, жилийн дундаж ашиг нь хэд байна вэ. Үүнээс 1072 хувьцаанд буюу Монгол Улсын иргэдэд хэдэн төгрөг хуваарилсан байдаг вэ. Дээрээс нь яагаад заавал 2024 оны хавар тараагаад байгаа юм. Та нар 2020 онд ноолуурын үе болоогүй байхад ноолуурыг  100 мянган төгрөгөөр бодож байсан. Үр дүнд нь та нар 65 суудал УИХ-д авч байсан. Өнөөдөр хувьцаа тарааж өгөөд, ахиад жаахан худлаа яриад 126 суудлаас ихэнхийг нь авах бодолтой байгаа гэж хараад байна. Дэмжиж байгаа ч яагаад сонгуулийн өмнө ийм тогтоол батлах гээд байгаа юм бэ” гэлээ.