УИХ-ын чуулганы нэгдсэн хуралдаанаар “Эрдэнэс Тавантолгой” хувьцаат компанийн хувьцааны талаар авах зарим арга хэмжээний тухай” Улсын Их Хурлын тогтоолын төслийн анхны хэлэлцүүлгийг хийлээ. Хуулийн төсөлтэй холбоотой гишүүд үг хэлж, асуулт асуулаа.

УИХ-ын гишүүн Г.Дамдинням: 1072 хувьцаа хэзээ хувьцаа болж Монгол Улсын болон олон улсын хөрөнгийн бирж дээр арилжаалагддаг болох вэ. Өвлүүлж, бэлэглэж, ард түмэн хэдэн хувийн хувьцаа эзэмшихээ дарга нараас асуух биш өөрсдөө шийддэг болох вэ. Байгалийн баялаг тогтмол нэг үнээ барина гэж байхгүй. Тэгэхээр түүхий эдийн үнэ унавал компани өөрөө эрсдлээ үүрээд гарч чадах уу, Өр ширээ дарж байгаа юу. Махыг нь идэх гээд үнээгээ алаад идэж болохгүй. Олон мянган жил ард түмэн байгалийн баялагаа шудрага хүртмээр байна. Түүнээс нэг гишүүн 560 нөгөө нь 440, 230 гээд баймааргүй байна зах зээл өөрөө үнээ тогтоодог баймаар байна.

"Эрдэнэс Монгол" ХК-ийн захирал С.Наранцогт: 2010 онд хувьцааны хэлбэрийг зааж өгөөгүй, хязгаарлагдмал хувьцаа гаргасан. Энэ тогтоол дээр бид эхний заалт дээр  2012 оны дөрөвдүгээр сараас хойш төрсөн иргэдэд энгийн хувьцаа олгохоор болж байна. Энэ тогтоол батлагдсанаар амьтай хувьцаа болж байгаа юм. Бид өр ширнээсээ гарч байж хөрөнгийн зах зээлд гарна. Бид жилд нэг их төгрөгийн өр төлж байгаа. Хуримтлагдсан өр дөрөв орчим их наяд байна. Үүнээс ихэнх нь урьдчилж авсан өр төлбөр байна. Нөгөө нь гишүүдийн хэлж байгаагаар том төслүүдэд санхүүжилт хийгээд өр төлбөр болсон 4.6 их наядын асуудал байна.

УИХ-ын гишүүн Х.Ганхуяг: Энгийн хувьцаа эзэмшдэг болсноор өмчлөх, шилжүүлэх, өвлөх эрхээ эдлэх үү. Нүүрсний сонсголоор 5.2 сая тонн нүүрс "Эрдэнэс Тавантолгой" ХК алдсан гэж ойлгосон. Гэтэл өнөөдөр энэ талаар ямар ч мэдээлэл алга. Энэ дээр ямара арга хэмжээ авч байгаа вэ. 5.2 сая тонн гэдэг бол өнөөдрийн ханшаар 700-800 сая ам.доллар болж байна. Энэ мөнгө хэзээ компанийн дансанд орж ирэх вэ. 2009 оны ТЭЗҮ-ээр 750 сая ам.доллараар төмөр замаа барьж, холболтын цэг, дохиолол, хөдлөх бүрэлдэхүүнээ авсан гэж байгаа. Өнөөдөр хөдлөх бүрэлдэхүүн орохгүй тэрбум ам.доллар болчихжээ. Ногдол ашгийг боломж байвал жил болгон олгодог баймаар байна. Дээр нь компанийн ашиг орлогын мэдээллийг нээлттэ ил тод өгдөг баймаар байна. Төр хувь эзэмшдэг бол хуулиараа төсөв юм уу, Ирээдүйн өв сан рүү ашиг нь ордог баймаар байгаа юм.

"Эрдэнэс Монгол" ХК-ийн захирал С.Наранцогт: Энгийн хувьцааг нээх, бүртгэх ажил тогтоол батлагдчихвал мөрдөгдөөд явна. Компанийн үйл ажиллагааг нээлттэй болгох тал дээр ажиллаж байна. Хараат бус гишүүдийн тоог нэмж, 49 хувьд хүргээд байна. Сонгон шалгаруулалт зарлаж хараат бус гишүүнийг томилж байгаа. Хувьцаа үнэлгээ нэмэгдээд ирэхээр хувьцаа бодитоор амилж эхэлнэ.

"Эрдэнэс Тавантолгой" ХК-ийн БЭТ Ж.Ганбат: Нүүрсний сонсголын үеэр 5.2 сая тонн нүүрс дутсан яригдсан. Цагаан хот бүсэд байрлах нүүрс ачиж, буулгах 36 теримналын пү-ний программд бүртгэгдсэн ажилтны бүртгэл болон Гаалийн ерөнхий газрын системийн бүртгэлтэй тулгасан. Эндээс 5.2 сая тонн нүүрс бүртгэлгүй гаргасан байж болзошгүй байна гэж гарсан. Нүүрсний сонсголын дараа худалдан авагч талаас тулгалт хийсэн. Эндээс зөрүү үүсээгүй гэж гарсан. Мэдээллийг лавшруулж байгаа. "Эрдэнэс Тавантолгойн" нүүрсээр төлбөр хийсэн оффтейк гэрээн төлбөрүүдийг барагдуулж эхэлсэн.