УИХ-ын чуулганы үдээс өмнөх хуралдаанаар Хөрөнгө оруулалтын тухай хуулийг хэлэлцэв. Энэ үеэр ХХААХҮ-ийн сайд Х.Болорчулуун үг хэллээ.

           Тэрбээр “Оруулж ирж байгаа хууль учир дутагдалтай байна. Аливаа хөрөнгө оруулалтыг хийхдээ бусад улс, орнууд босго зааж өгсөн байдаг. Хөрөнгө оруулагчийн нэрээр цагаач иргэд  олноор ирэх вий гэсэн болгоомж төрүүлж байна. Магадгүй 10 жилийн дараа монголчууд газар нутаг дээрээ цөөнх болоод явж байхыг үгүйсгэх арга алга" гэв.

          Харин Эдийн засаг, хөгжлийн сайд Ч.Хүрэлбаатар “Хэдүүлээ цээжний бангаар яримааргүй байна. Дургүй зүйлээ болохоор үлгэр зохиож ярьдаг. Бодит байдлаа харж яримаар байна, Х.Болорчулуун сайд аа. НҮБ-ийн Худалдаа хөгжлийн бага хурлын мэдээллийн санд байгаа 136 орноос 24 улс л хөрөнгө оруулалтын босготой. Улс орноо хөгжүүлмээр байна, Х.Болорчулуун сайд аа. Таны хариуцсан салбарын өнгөрсөн жилийн өсөлт найман хувиар буурсан байна. Та бид хоёр нэг Засагт сууж байгаа” гэв.