Гадаадын хөрөнгө оруулалтын хуулийн төслөөр УИХ-ын гишүүн Г.Амартүвшин мэдээлэл өглөө. Тэрбээр “Аж ахуйн нэгжүүд гаднаас хөрөнгө оруулалт оруулж ирэхдээ зээлийн хүүг өндөр үнээр оруулж ирж байна. Гаднын хөрөнгө оруулагчдын шаардаж байгаа өгөөжийг харах хэрэгтэй. Гадаадын хөрөнгө оруулалтын хууль бол чухал. Хөрөнгө оруулалтын тухай хуулиар бид гаднын хөрөнгө оруулагчдыг бусад орнуудтай өрсөлдөхүйц хэмжээнд байлгах хэрэгтэй. Түүнээс гадныхныг Монголд оруулж ирээд байгаа бүхнээ өгч буй асуудал биш. Хөрөнгө оруулалтын тухай хуулийн Ажлын хэсэг байгуулагдаж түргэн шийдмээр байна. Гадаадын хөрөнгө оруулагчид “Танай улсыг бид их сонирхдог. Хөрөнгө мөнгө оруулж ирэхээр биднийг шантаачилж байгаад хөрөнгийг минь булаачих гээд байдаг. Хоёрдугаарт, маргаан гаргаад шүүх дээр очихоод шоглочихоод байдаг” гэсэн тайлбар өгдөг. Тэгэхээр хөрөнгө оруулагчдын маргааныг хуулиар сайтар зохицуулж өгөх хэрэгтэй.  Хөрөнгө оруулагчдын хөрөнгө мөнгийг хамгаалж байж эдийн засгийн ашигтай нөхцөл байдал үүснэ” гэв.