МАН-ЫНХАН АРД ТҮМНЭЭС АЙСАНДАА АМ Л НЭЭВЭЛ АЧИГДАХ, ЦАХИМ ХАЯГГҮЙ БОЛГОХ ХУУЛИУД САНААЧИЛЛАА

      Улстөрчид энэ жилийн сонгуулиар өөрсдийн зураг, гарын үсэгтэй аяга, шаазан, бетон, саваар иргэдээ хуурч чадах уу. Ямар ч үед иргэдээ атга чихэр, аяга сахар,  20 мянган төгрөгөөр аргалчихдаг тэд зангаа тавихгүй нь лавтай. Гэхдээ энэ удаад хэчнээн мөнгөөр булдиад замаа засаж чадахгүй гэдгээ мэдэж, хуулиар ард түмэн, хэвлэл мэдээллийнхний амыг таглахаар зэхэж байна. Ард түмнээс айсандаа ам нээвэл ачигдах, цахим хаягаа хаалгах, торгуулах хуулиудыг Эрүүгийн болон Зөрчлийн тухай хуульд хэд хэдээр “чихэж” байх аж. Тухайлбал, өчигдрийн чуулганы хуралдаанаар УИХ-ын гишүүн Г.Дамдинням “Цагаан сараар ах, дүүдээ бэлэн мөнгө барьж золговол сонгуульд бэлдэж, сонгогч татсан хэрэгт орох уу” хэмээн Сонгуулийн ерөнхий хорооныхноос асууж, айж байгаагаа илэрхийлэх жишээтэй. Түүний хариуд УИХ-ын дарга Г.Занданшатар “Дамдинням аа, чи мөнгө тараах талаар битгий яриад бай. Сонгуулийн жил мөнгө, бетон, сав тараах нь авлига” хэмээн уурласан нь намынхаа төлөө байсан биз. Мөн МАН-ын дарга Д.Тогтохсүрэн сошиал багийнхнаас айж, Сонгуулийн төв байгууллагын тухай хуульд өөрчлөлт оруулж өгөхийг санал болгов. Ингэхдээ сонгуулийн үеэр хуурамч цахим хаягуудыг хаах, хиймэл оюун ухаанаар хүний хэлээгүй үг, хийгээгүй үйлдлийг хийсэн болгодог байдлыг таслан зогсоох арга байгаа эсэхэд санаа зовж байв. Тэднийг дээрх байдлаас ажиглахад сонгуулийн үеэр нэгнээ “намнадаг” муйхар арга болоод ард түмнээсээ айж байгаа нь илт байв. Үнэндээ тэд сонгуулиас өмнө өөрсдийнхөө улс төр дэх хар бараан түүх, авлига, албан тушаалын хэрэг, мөнгө идсэн байдлаа нууж, бусдын амыг таглахаар янз бүрээр үзэж байгаа нь энэ.

ИРГЭДЭЭ УЛ БООВ, УЛААН УУТТАЙ ЧИХРЭЭР АРГАЛААД СУРЧИХСАН МАНЫНХАН СОНГУУЛИАР ЯМАР БЭЛЭГ БАРИХ ВЭ

     Улстөрчид зөвхөн сонгууль уламжлалт баяр ёслол, тойрогтоо ажиллах үеэрээ иргэдийг ул боов, оймс, цаг тооны бичиг, улаан ууттай чихрээр хуураад сурчихсан. Бас хажуугаар нь өөрсдийнхөө нэлийсэн том зурагтай сэтгүүл, аяга, шаазан бариастай. Энэ нь тэдний дараагийн сонгуульд бэлдэж, нэр, нүүрээ цэвэрлэж байгаа “Авлига” болдог. Гэвч тэд өгөөд, иргэд аваад сурчихсан. Энэ жилийн сонгуулиар ч мөн адил тэдний бульдсан мөнгөөс хүртэхийг хүссэн олон хүн байгаа нь цахим орчноос илт байв. Иргэдээ сонгуулиар, намын хурлаар уут чихэр, гурил, будаа горьддог болтол нь туйлдуулдаг нь тэдний бас нэг арга. Тэдний уйтгартай хурлыг өдөржин сонсож байгаад бэлэг тараах үеэр нь нэг иргэн амиа алдаж байсан харамсалтай хэрэг бий. Амь, амьдралын дайтай намын, улстөрчийн бэлэг байдаг. Жил бүр улстөрчдийн тараасан бэлэг олон нийтийн сүлжээнд ил болж, олны шүүмжлэлийг дагуулдаг ч өнөөдрийг хүртэл үргэлжилсээр байгаа нь харамсалтай.