УИХ-ын чуулгын нэгдсэн хуралдаан үргэлжилж байна. Хуралдаанаар Сонгуулийн ерөнхий хорооны гишүүнийг томилж, чөлөөлөх асуудлыг хэлэлцүүлж байна. Хэлэлцэж буй асуудалтай холбоотой гишүүд асуулт асууж, хариулт авлаа.

УИХ-ЫН ГИШҮҮН Д.ТОГТОХСҮРЭН: Сонгуулийн төв байгууллагын тухай хуульд өөрчлөлт оруулж, хоёр ангилж өгмөөр байна. 2024 оны сонгуулиар сөрөг нөлөөний асуудал гарч ирээд байна. Нэгдүгээрт, сошиал медиа орчин байна. Албан бус мэдээллээр 2.6 сая фэйсбүүк хаяг  байна. Үүний 1.5 нь хуурамч байгаа гэсэн мэдээлэл байна. Сонгуулийн үед хуурамч хаягуудыг илрүүлэх техникийн боломж ямар байна вэ. Хоёрдугаарт хиймэл оюун ухаанаар хүний хэлээгүй үг, хийгээгүй үйлдлийг хийсэн мэт болгодог болжээ. Үүнийг илрүүлэх хариуцлага тооцох ямар боломж байгаа вэ.

ЦЕГ-ЫН ДАРГА Т.СҮХБОЛД: Монгол Улсын фэйсбүүк хэрэглэгчийн тоо Азид тэргүүлэх байр эзлээд явж байна. Цагдаагийн байгууллагаас тролл хаяг, хуурамч хаягийг илрүүлэх ажлыг эхлүүлсэн. Кибер гэмт хэрэгтэй тэмцэх 40 хүний бүрэлдэхүүнтэй багийг 80 болж өргөтгөсөн. Алба хаагчдын мэдлэг чадварыг нэмэх чиглэлээр ажил хийж байна. Техникийн боломж дутуу байна. Техник хэрэгсэл байнга шинэчлэгддэг. Хуурамч хаяг үүсгэж, хүний нэр хүндэд халдаж байгааг 2023 онд 50.3 хувьтай илрүүлээд байна. Эрх зүйн боломж байгаа гэж харж байна. Харилцаа холбооны зохицуулах газраас хуурамч мэдээлэл түгээсэн гэж үзвэл интернэт орчинд мэдээлэл түгээх эрхийг нь хаах бүрэн боломжтой. Хиймэл оюун ухааны хувьд 2023 оны гуравдугаар сараас гарч эхэлсэн. Гадаад хэл дээр хүнийг яриулдаг байсан бол монгол хэл дээр ярьдаг болж байна. Хиймэл оюун ухаанаар хийж байгаа үйлдлийг шинжээчийн дүгнэлтээр хуурамч гэдгийг гаргах боломжтой.