Нийслэлийн нийтийн тээвэрт парк шинэчлэл хийх ажлыг Нийслэлийн Засаг даргын Тамгын газраас зохион байгуулж буй.

     Энэ талаар нийслэлийн Засаг дарга бөгөөд Улаанбаатар хотын захирагч Х.Нямбаатар "Нийтийн тээврийн автобус нийлүүлэх тендерт БНХАУ-ын Yutong Bus Co.,Ltd шалгарсан. Нийслэлийн Засаг даргын тамгын газар болон Yutong Bus Co.,Ltd өнгөрсөн баасан гаригт гэрээ байгуулсан. Гэрээний дагуу 2024 оны нэгдүгээр сарын 31-н гэхэд 600 автобус нийлүүлсэн байхаар тусгасан" хэмээн мэдэгдсэн билээ.

     Тэгвэл эхний ээлжийн автобус өчигдөр Эрээний чиглэлд гарсан байна. Үүнтэй холбоотойгоор цахим орчинд одоо ирж байгаа автобус Хотын дарга Х.Нямбаатарын анх танилцуулж байсан автобуснаас өөр байна гэх шүүмжлэл цахим сүлжээнд тарахаад байна. Энэ талаар Нийслэлийн Засаг даргын хэвлэлийн төлөөлөгч Н.Сугар "Шинээр ирж байгаа автобусны зураг зөрж байна гэх шүүмжлэл гарч байна. Шинэ автобуснууд хамгаалалтын хуулгатай замд явах юм билээ. Улаанбаатарт ирсний дараа хуулгыг авна. Автобуснууд эхний зураг дээрх шиг өнгө үзэмжтэй ирнэ" гэжээ.