УИХ-ын ээлжит хуралдаанаар  "Эрдэнэс Тавантолгой" ХК-ийн хувьцааны талаар авах зарим арга хэмжээний тухай тогтоолын төслийг хэлэлцэж байна.

         Энэ үеэр УИХ-ын гишүүн Г.Дамдинням "Улс орон даяараа нүүрсний хулгай яриад УИХ арга хэмжээ авч, олон нийт өргөн дэлгэр хэлэлцүүлэг хийж байна. Төрийн өмчийг хэрхэн хяналтгүй байлгавал хэрхэн хулгай хийж, идэж, ууж дуусгадгийг ард түмнээрээ хараад сууж байна. Олон түмнээсээ нууж, улсын нууцад авч байгаад хэрхэн хүн УИХ болон ард түмний хараа хяналтаас гадуур хэрхэн асгаж, цутгаж хагартлаа баяждагийг харж байна. Энэ үед ард иргэддээ 34 хувийг өгнө гэдэг олон нийтийн хяналтад оруулах эхний том алхам. Гэхдээ энэ ажил цаашид үргэлжлэх ёстой. Хувьцааг олон нийтэд өгнө гэдэг олон нийтийн хяналтыг оруулж ирж байгаа том хэлбэр. Тиймээс дэмжиж байна. Цаашид хөрөнгийн бирж дээр гаргах ёстой, олон улсын хөрөнгө оруулалтыг оруулж ирэх ёстой. Хамгийн гол нь ард иргэдийнхээ байгалийн баялагийг эзэмшээд, зөв захиран зарцуулах хяналт тавьдаг эрхийг бүрэн нээнэ шүү. Дан ганц хувьцаа, ногдол ашиг тараах тухай асуудал биш. Зөв хөрөнгө оруулалт татаж, ил тод байх тухай асуудлыг бид ярих ёстой. Мөн "Дархан Төмөрлөгийн үйлдвэр", Хөтөл цемент шохойн үйлдвэр", "Эрдэнэт үйлдвэр"-ийг олон нийтийн хувьцаат компани болгож өөрчлөх ажлыг хийх ёстой" гэв.