Нүүрсний хэргийг хянан шалгах түр хорооны хоёр дахь шатны нээлттэй сонсгол өнөөдөр тав дахь өдрөө үргэлжилж байна.

Нотлох баримтыг шинжлэн судлах сонсголын үеэр УИХ-ын Хянан шалгах түр хорооны гишүүн Ж.Бат-Эрдэнэ “Нүүрсний сонсголд олон гэрч оролцлоо. Энэ Сонсголд оролцож байгаа хүмүүс гайхамшигтай сайхан бүтээн байгуулалт хийсэн гээд бахархаад сууж байна. Өчигдөр гэхэд түлш хийдэг компанийнхан өөрсдөө алдагдалтай ажиллаж, хямдхан түлшийг ард түмэнд нийлүүлсэн гэж бахархаж байна лээ. Камерын өмнө ялархаад, нойр хоолгүй ажилласнаа гайхаад байгаа хэрнээ цаанаа хэдэн тэрбумаар нь халаасаа түнтийлгэчихсэн байгаа юм.

Мөн өчигдөр "Бодь Интернэшнл" группийн захирал Д.Баясгалан “Монгол Улсыг Төмөр замтай болгосон. 20 гаруй тэрбумын алдагдалтайгаар энэ бүтээн байгуулалтыг хийсэн” гэж ярьсан. Алдагдалтай хэрнээ жил гаруйн хугацаанд 140 тэрбумы төгрөгийн орлоготой болчихсон байсан. 12 хувийн хөнгөлөлттэй нүүрсийг авчихсан байгаа байхгүй юу даа. Эндээс өгчихсөн болж таарч байгаа юм. Алга цайруулдаг юм чинь яах вэ, яах вэ гэж өнгөрөөгөөд байж болохгүй. Наашаа харж буянтан болоод, цаашаа харж хулгай хийгээд байж болохгүй. Үүнтэй Засгийн газар хатуу тэмцэж байгаа” гэсэн юм.