Нүүрсний хэргийг хянан шалгах хоёр дахь шатны сонсгол дөрөв дэх өдрөө үргэлжилж байна.

      ХЯНАН ШАЛГАХ ТҮР ХОРООНЫ ДАРГА Б.ЭНХБАЯР: Гашуун сухайтын төмөр зам дээр нийт 204 сая ам.доллар буюу 18 хувийн хөнгөлөлттэй үнээр "Бодь Интернэшнл" групптэй гэрээ байгуулсан байна. Тус групп гаднаас хөрөнгө босгох юм бол нүүрсээр хөнгөлөлт үзүүлнэ гэсэн байгаа юм. Эхний асуултыг Д.Баясгалан захирлаас асуумаар байна. Энэ төслийг хэрэгжүүлэхдээ "Бодь Интернэшнл" групп хэдэн төгрөгийн хөрөнгө хаанаас татсан бэ. 

             "БОДЬ ИНТЕРНЭШНЛ" ГРУППИЙН ҮҮСГЭН БАЙГУУЛАГЧ Д.БАЯСГАЛАН: Манайх санхүүжилтээ нэг хэсгийг нь бэлэн мөнгө, нөгөө хэсгийг нь нүүрсээр авсан. Нүүрсний сонсголд шинжээчдийн гаргасан дүгнэлт, зарим зүйл нь нийгэмд буруу ойлголт өгч байна. Тухайлбал, эхний өдрийн хуралдаанд 5.2 сая тонн нүүрс улсын хилээр ямар ч бүртгэлгүй гарсан гэсэн мэдээлэл гарсан. Үүнээс үүдэн хүмүүс таван тэрбум долларын нүүрс алга болсон юм шиг ойлголт авсан. Энэ миний асуудал биш ч нүүрсний худалдаа, хөнгөлөлт, худалдан авагчид яаж явдаг талаар нарийн зүйлсийг хэлж өгмөөр байна. Манай компани нүүрс борлуулдаггүй. Та нарын зүгээс биднийг хөнгөлөлттэй үнээр нүүрс худалдаж аваад, түүнийгээ зах зээлийн үнээр зараад дундаас нь ашиг олдог гэж бодож  байна. Нүүрсний үнийн хөнгөлөлт гэдгийг "Чалько" компани тогтоодог. Бид "Эрдэнэс Тавантолгой" ХК-аас төмөр замын бүтээн байгуулалтад зориулсан нүүрс гэсэн тодотголтойгоор нүүрс аваад, өдөрт нь нэрлэсэн худалдан авагчид өгдөг. Тэр мөнгө нь төмөр замын бүтээн байгуулалтад ороод, "Эрдэнэс Тавантолгой" ХК-аас "Тавантолгой төмөр зам"-д оруулсан дуусаагүй хөрөнгө үйлдвэрлэлийн хөрөнгө оруулалтад бүртгэгдээд, улсын комисс хүлээж аваад, батлагдсаны дараа баланс нь дууссан бүртгэл гэж бүртгэгдээд явдаг. Тэгэхээр төмөр замын бүтээн байгуулалтдаа улс зардаг үнээрээ нүүрс зарсан байвал нэг ч Хятадын худалдан авагч нүүрс худалдаж авахгүй. Төмөр замд зориулсан худалдан авалт гэж байхгүй. Бид нэг ам.доллар, нэг цент ч нэмж өөрийнхөө компанид авч байгаагүй. Энэ бүхэн минь тайлан, тооцоогоор гарч ирнэ.