САНГИЙН ЯАМНЫ ГАЗРЫН ДАРГА АСАН Ц.БАТЗУЛ: Манай ах "Говь капитал менежмент" ХХК-ийн 17 хувийг эзэмшдэг

2023-12-21, 580

Нүүрсний хэргийг хянан шалгах хоёр дахь шатны сонсгол дөрөв дэх өдрөө үргэлжилж байна.

Энэ үеэр Шинжээч "Тавантолгой-Зүүнбаян чиглэлийн төмөр замын төслийг санхүүжүүлэхээр 20 жилийн хугацаатай, хүүгүй, хаалттай нөхцөлтэй бондыг "Монголын төмөр зам" ТӨХК гаргасныг "Эрдэнэс Тавантолгой" ХК худалдан авсан. Төслийн нийт батлагдсан төсөв нь нэг их наяд 392.2 тэрбум төгрөг байна" гэсэн юм.

ХЯНАН ШАЛГАХ ТҮР ХОРООНЫ ДАРГА Б.ЭНХБАЯР: Зүүнбаян чиглэлийн төмөр замыг Монголын Зэвсэгт хүчин жанжин штабыг оролцуулан хямд зардлаар барьж байгаа. Тиймээс тухайн үеийн гэрээг бүгдийг нь улсын нууцад авсан байдаг. Гэтэл Зэвсэгт хүчин 11.8 гаруй хувийн ажлыг цэргүүдээр гүйцэтгүүлсэн. Үлдсэн 88 хувийг компаниудаар гүйцэтгүүлсэн байгаа юм. Өөрөөр хэлбэл Зэвсэг хүчний жанжин штабаар хаацайлуулж бүх асуудлаа улсын нууцад хамруулсан нөхцөл байдал тогтоогдож байгаа. Бусдаар гүйцэтгүүлсэн ажилд УИХ-ын гишүүдийн хамаарал бүхий компанид харагдаж байна. Төрийн худалдан авах ажиллагааны дарга Ц.Батзул ирсэн байна. Та тухайн үед Сангийн яамны газрын дарга, дэд ажлын хэсэгт ажиллаж байсан. Таны ахын хамаарал бүхий "Говь капитал менежмент" ХХК 13 тэрбум төгрөгийн ажил гүйцэтгэсэн шинжээчийн дүгнэлт гарч ирсэн. Үүнд ямар тайлбар хийх вэ?

САНГИЙН ЯАМНЫ ХУДАЛДАН АВАХ АЖИЛЛАГААНЫ ХЭЛТСИЙН ДАРГА Ц.БАТЗУЛ: Би дэд ажлын хэсэгт Засгийн Газрын Хэрэг Эрхлэх Газрын даргын тушаалаар орж ажилласан. Энэ ажлын хүрээнд нийт 2.382.6 метр урттай 27 ширхэг гүүр барих ажил байсан. Үүний сонгон шалгаруулалтын ажлыг Улаанбаатар төмөр зам хийсэн. Харамсалтай нь энэ сонсголд Улаанбаатар төмөр замаас хүн ирээгүй байна. Үүнд хамгийн уртдаа 226 метр, хамгийн богино нь 13.9 метр урт гүүр барихаар ТЭЗҮ-д туссан байсан. Ажлын хэсгийн хуралд танилцуулагдаагүй. Манай ах "Говь капитал менежмент" ХХК-ийн 17 хувийг эзэмшдэг. Гүүр барьдаг энэ компанийг нийт зургаан хүн хамтран эзэмшдэг. Үндсэн үйл ажиллагаа нь Оюутолгойн гүний болон ил уурхайн барилгын ажлыг гүйцэтгэдэг. Улаанбаатар төмөр замаас гүүр барих зөвшөөрөлтэй бүх компани руу хүсэлт явуулж үнэ аваад сонгон шалгаруулалт нь хийгдээд дэд ажлын хэсэгт орж ирсэн. Өглөөний хурал байсан гэж санаж байна. Хурлын даргалагчаар Зэвсэгт хүчний жанжин штабын дарга Д.Ганзориг генерал байсан. Д.Ганзориг генералд "Сонгон шалгаруулалтад оролцсон компанийг манай ах эзэмшдэг учраас оролцох боломжгүй байна" гэдгээ ярьж татгалзсан байгаа. Шинжээчид хурлын протоколтой танилцсан бол миний ярьсан үг байгаа.

САНГИЙН ЯАМНЫ ГАЗРЫН ДАРГА АСАН Ц.БАТЗУЛ: Манай ах "Говь капитал менежмент" ХХК-ийн 17 хувийг эзэмшдэг