Цаг агаарын хэт хүйтрэлт, томуу, томуу төст өвчний тохиолдлын тоо нэмэгдэж байгаатай холбогдуулан улсын хэмжээнд өмчийн бүх хэлбэрийн ерөнхий боловсролын сургуулийн суралцагчдын 2023-2024 оны хичээлийн жилийн хоёрдугаар улирлын танхимын хичээл, сургалтыг зайн, цахим хэлбэрээр зохион байгуулахаар шийдвэрлэжээ.  Энэ талаар Боловсрол шинжлэх ухааны яамны Боловсролын ерөнхий газрын дарга Т.Ням-Очир "Боловсрол шинжлэх ухааны яамнаас арванхоёрдугаар сарын 16-нд мэргэжлийн байгууллагуудад хандаж, өвөлжилт болон цаг агаар, томуу томуу төст өвчний талаар мэдээлэл авсан. Улмаар Ерөнхий боловсролын сургуулийн хичээл сургалтад зохицуулалт хийх тухай Боловсрол, шинжлэх ухааны сайдын тушаал гаргалаа.

    Бага ангийн сурагчдын хичээл сургалтыг арванхоёрдугаар сарын 18-29 хүртэл зайн, цахим сургалтад шилжүүлж байна. Хоёрдугаарт дунд, ахлах ангийн сурагчдын хичээлийг арванхоёрдугаар сарын 25-29 хүртэл зайн болон цахим хэлбэрт шилжүүлэх тушаал гаргалаа. Маргаашнаас эхлээд бага ангийн сурагчид зайн сургалтад шилжих тул сургалтын үйл ажиллагааг хангах шаардлага үүсэж байна. Мөн бага насны хүүхдүүдийг харж хандах боломжгүй нөхцөл байдал үүснэ. Тиймээс аж ахуйн нэгж, төрийн байгууллагууд алба хаагчиддаа чөлөө өгөх зохицуулалт хийхийг зөвлөж байна. Харин цэцэрлэгийн үйл ажиллагаа хэвийн явна. Гэхдээ хүүхдээ цэцэрлэгт өгөхгүй байх боломжтой. Өөрөөр хэлбэл, эцэг, эхийн сонголтоор хичээл сургуульд нь хамруулах боломжоор хангах ёстой. Гуравдугаарт, хөдөө орон нутагт зудын эрсдэлтэй, зам харгуй хаагдсан байна. Тиймээс арванхоёрдугаар сарын 29 хүртэл дотуур байрны үйл ажиллагааг хэвийн явуулахыг зөвлөж байна. Өвөлжилт хүндэрсэн аймгуудад эцэг, эхэд нь гараас гарт хүргэх, тэр хүртэл дотуур байрны багш, сурган хүмүүжүүлэгч нарыг асран хамгаалах үйлчилгээгээр хангах үүрэг өгч байна. Иймд орон нутгийн сурагчид яаран гэр рүүгээ явахгүй байх нь зүйтэй" гэлээ.