ЗАСГИЙН ГАЗАР "ХУЛГАЙЧ" ГИШҮҮДДЭЭ БҮРЭН ХАРИУЦЛАГА ТООЦОЖ ЧАДАХ УУ

     Энэ Засгийн газар гишүүддээ бүрэн хэмжээний хариуцлага тооцож чадах юм бол УИХ-ын гишүүд сонгуульд дахин өрсөлдөх чансаагүй болох нь ээ. Өөрөөр хэлбэл, сонгуулиас өмнө УИХ тарж мэдэх галыг өчигдөр Хууль зүй, дотоод хэргийн сайд Б.Энхбаяр тавилаа. Тэрбээр нүүрсний хоёр дахь сонсголд ЗГХЭГ-ын дарга, Сангийн сайд, Байгаль орчин, аялал жуулчлалын сайд, Эдийн засаг, хөгжлийн сайд гээд эрх мэдэл бүхий 268 хүнийг дуудсан. ЗГХЭГ-ын дарга нь сайд нартайгаа оролцох ирэх долоо хоногийн нүүрсний хэлэлцүүлэгийг иргэд чих тавина сонсож, хуруу даран хүлээж байна. Нүүрсний эхний сонсголд улс төрд нөлөө бүхий томчууд төдийгүй Ерөнхийлөгч асан, Ерөнхий прокурор асан эрхмүүдийг дуудсан нь мөн л иргэдийн хүлээлт байсан. Зөвхөн нүүрсний сонсгол гэлтгүй өнгөрсөн жил Хөгжлийн банкны хэргээр хэчнээн гишүүнийг түтгэлзүүлэх санал гаргаж, зарим нь өөрийн хүсэлтээр түтгэлзэх хүсэлтээ өгч байснаас харахад, МАН-ынхны идэж, уусан асуудал дуусдаггүй тодорхой байв. УИХ-ынханд гар дүрээгүй сан, хумслаагүй боломж гэж байхгүй. Байж болох бүхэнд олноороо хошууран дайрч, эрх бүхий компанидаа, гэр бүлийнхэндээ, найзуудынхаа нэрээр төрийн мөнгийг "идэж" ирсэн нь алхам алхамаар буюу нүүрсний сонсгол, Хөгжлийн банкны сонсгол, хэвлэл мэдээллийнхний хүчээр ил болсоор байна. Тэдний ямар ичгүүргүй хулгайч, луйварчид болохыг иргэд ч ухаарсаар байгаа нь ирэх сонгуулиар нэгийг бодуулах биз ээ.  Хөгжлийн банкны сонсгол, нүүрсний сонсгол хэмээн сүр дуулиантай хэдэн хүний нэр зарлаж, хэлэлцүүлэг хийсэн болоод өнгөрөх биш жинхэнэ, бодит үр дүнг хүлээж байна. Аливаа хэрэгт буруутай хэмээн тооцогдож байгаа сайд, гишүүн бүрд хариуцлагыг нь хүлээлгэж, төрийг, МАН-ынхныг "цэвэрлэх" цаг нь болсон гэдгийг иргэд шаардаж байна. 

ЯЛЛАГДАГЧААР ТАТАГДАН ШАЛГУУЛЖ БАЙГАА УИХ-ЫН ГИШҮҮДИЙН ХЭРЭГ 

     Нүүрсний хулгай, Хөгжлийн банкны хэрэгт холбогдож хууль хяналтын байгууллагад хэд хэдэн гишүүн шалгагдаж байгаа. Өнгөрсөн хугацаанд нүүрсний хулгайн хэрэгт холбогдсон болон Хөгжлийн банкны хэрэгт холбогдсон гишүүд Их хурлын гишүүний бүрэн эрхээсээ өөрийн хүсэлтээр чөлөөлөгдөж, шалгуулах хүсэлтэй байгаагаа илэрхийлж байлаа. Харин хаврын чуулганаар АТГ-аас нэр бүхий гишүүдийн бүрэн эрхийг түдгэлзүүлж, шалгах шаардлагатай байгааг мэдэгдэж байв. Тодруулбал, өөрийн хүсэлтээр чөлөөлөгдөх хүсэлтээ өгсөн УИХ-ын гишүүн Ж.Мөнхбат, Т.Аюурсайхан нар дээр нэмээд УИХ-ын гишүүн Д.Бат-Эрдэнэ, Н.Наранбаатар нарын бүрэн эрхийг түдгэлзүүлэх саналыг хүргүүлсэн гэсэн үг. Түүнчлэн УИХ-ын гишүүн А.Адъяасүрэн, Б.Энх-Амгалан, Ш.Раднаасэд нарыг нүүрсний хулгайн хэрэгт холбогдуулан яллагдагчаар татан шалгаж байгаа. Нүүрсний хулгайн хэрэг өнгөрсөн өвөл, хавар хэсэг шуугиж байгаад одоо сонсголоор дахин сэргэж байна. Саяхан АТГ-аас зарим УИХ-ын гишүүнийг хэрэг ямар үе шаттай яваа талаар мэдээлэл өгсөн юм. Тухайн үед “Нүүрсний хулгайтай холбоотой хэргийн 85 хувийг шүүхэд шилжүүлсэн. Тэднээс онцолбол, УИХ-ын гишүүн Т.Аюурсайхан, Б.Ганхуяг нарын хэрэг шүүхэд шилжсэн. Одоогийн байдлаар УИХ-ын гишүүн А.Адъяасүрэн, Д.Бат-Эрдэнэ нарын мөрдөн байцаалт дуусаж, хэргийн холбогдогч нарт хэргийн материалыг танилцуулж байгаа. УИХ-ын гишүүн Н.Наранбаатарыг шалгах ажиллагаа дуусаагүй байна" гэсэн юм. 

 ЗАДАРСАН ГИШҮҮДДЭЭ ХЭЗЭЭ ХАРИУЦЛАГА ТООЦОЖ СУРАХ ВЭ

      Үүнээс гадна зуданд боогдсон иргэд шатахуунгүй зутарч,  нийслэлчүүд нь утаандаа угаартаж, хүүхэд, хөгшидгүй ханиаднаасаа салж чадахгүй байгаа энэ зутруухан үед УИХ-ын гишүүд нь газрын дарга нартайгаа нийлж, шоудаж байгаа бичлэг ил болов. Тодруулбал, Италийн алдарт “Ricchi e Poveri” хамтлаг Монголд ирж, 7.6 сая төгрөгийн ханштайгаар тоглолт зохион байгуулсан гэх. Уг тоглолтыг улстөрч, бизнесмен, нөлөө бүхий эрхмүүдээс гадна Ашигт малтмал, газрын тосны газрын дарга Л.Баярмандал үзсэн нь өдөржин, шөнөжин шатахуунд дугаарлаж байгаа иргэдийн бухимдлыг барсан. Иргэд нь ядарсан, гишүүд нь задарсан иймэрхүү байдалтай бид хэчнээн жилийг үзэх вэ. Тэдэнд хэзээ хариуцлага тооцож чадах вэ.