УИХ дахь Ардчилсан намын бүлэг хэлэлцсэн асуудлын талаар мэдээлэл өглөө.  

           Энэ үеэр УИХ-ын гишүүн Ж.Батсуурь “Шатахууны түлш тэг зогсолт руугаа явж байна. Аль 2016 онд шатахуун 1600 төгрөг байхад үнэтэй гэж байсан өнөөдөр хөдөөд дамлан худалдаалагдаад 5000-6000 төгрөг хүрч байна. Гэтэл дамлан худалдахыг зогсооно, хяналт тавьна гэж байна. Эрх баригчдын хариулт нь хоёр гурван хоногийн дотор гайгүй болно гэх зэргээр өнөө маргаашийг аргацаасан байдалтай байна. Тэгээд хэрэв энэ долоо хоногтоо аргалж чадахгүй бол уул уурхай руу өгөх түлшээ иргэд өгдөг ч юм уу гэнэ. Ашигт малтмал газрын тосны газрын дарга өндөр үнэтэй шинэ жилд ороод явж байна. Хөдөө очиж, зам зуур цас ямар байгааг, мянган километрийн цаана дизилийн үнэ хэрхэн дамлагдаж байгааг үзэж явах ёстой хүмүүс өндөр үнэтэй шинэ жилд ороод баян тансагаа харуулаад, гоё ганганаа дуудуулаад байж байна. Аж ахуй нэгжүүд өнөөдөр бүгд сөхөрсөн. Хөдөөд том байтугай жижиг нь ч ажиллахаа байсан. Ард түмнийг бүр ядран туйлдахаас өмнө арга хэмжээ аваач ээ, авч чадахгүй бол хариуцлагаа үүрээч ээ, сайд нараараа ажлыг нь хийгээч тооцооч, ажлуудж чадахгүй бол хариуцлага тооцооч" гэв.