УИХ дахь Ардчилсан намын бүлэг хэлэлцсэн асуудлын талаар мэдээлэл өглөө.  

           Энэ үеэр УИХ-ын гишүүн Ц.Туваан “Уул уурхай, хүнд үйлдвэрийн яамны шийдвэрийг хараад монголчууд өнөөдөр хүнд байдалд орчихлоо. Хоёр сар гаруйн өмнө шатахууны хомстол болох талаар ярьж байсан өнөөдөр өөрчлөгдсөн юм алга. Иргэд өнөөдөр таван цаг оочерлож байгаад АИ-92 шатахуунаа биш, түүнээс хавь илүү үнэтэй АИ-95 аваад л салж байна. Хөдөө орон нутагт бүр хүнд байгаа. Эрх баригчид шиг АИ-95 шатахуун хийдэггүй, авч ч үзээгүй байх. Тэд өдөр тутмынхаа хэрэгцээнд дизиль түлш л хэрэглэдэг. Зуд болж байгаа аймгуудад малаа алдацгаасан, өнөөдөр идшээ ч идэж чадаагүй, өвөлжөө, хаваржаандаа буугаагүй айл байхыг ч үггүйсгэхгүй. Дээрээс нь малаа алдсан, малынхаа араас явж чадахгүй байгаа. Зарим компаниуд зуд болж байгаа аймагт тусалья гээд хэдэн боодол өвс, тэжээл өгдөг ч ачаад явах түлштэй машин алга. Эрх баригчдын бодлого хаана байна. Хоёр сарын өмнөөс ярьсан шатахууны хомстлын асуудлыг хоёр хоногийн дотор шийднэ гэж байгаад үнэмшихгүй байна. Мөн  ард иргэдийг дахиад хянадаг, шалгадаг юм руугаа дахиад орж байгаа юм байна" гэв.