Монголын толгой “баячууд”-ын үзсэн гэх тоглолт олон нийтийн анхааралд өртөөд байна. Тодруулбал, Италийн алдарт “Ricchi e Poveri” хамтлаг Монголд ирж, 7.6 сая төгрөгийн ханштайгаар тоглолт зохион байгуулсан гэх. Уг тоглолтыг улстөрч, бизнесмен, нөлөө бүхий эрхмүүд үзэж, сонирхжээ. Уг тоглолтын талаар иргэд сэтгэгдлээ илэрхийлж, “Нүүрсний хулгайчид өөрсдөө зориулж тоглолт зохион байгуулжээ. Монголын толгой баячууд татвар төлөгчдийн мөнгөөр тансаглаж байна” хэмээн бичжээ.

Уг тоглолтыг улстөрч, бизнесмен, нөлөө бүхий эрхмүүдээс гадна Ашигт малтмал, газрын тосны газрын дарга Л.Баярмандал үзсэн нь анхааралд өртөж, шүүмжлэл дагуулаад байна. Иргэд хөхөө өвлийн хүйтэнд балга шатахуун олохоор дугаарлаж байхад хариуцсан салбарынх нь дарга 7.6 сая төгрөгийн ханштай тоглолт нь үзсэн нь бухимдал төрүүлж байгаа юм.

Тэгвэл Иргэдийг шатахуунд дугаарлаж байхад 7.6 сая төгрөгийн үнэтэй тоглолт үзээд, зугаалж явсан АМГТГ-ын дарга Л.Баярмандал гэж хэн бэ гэдгийг танилцуулж байна.

Л.Баярмандал нь 1967 онд төрсөн, 2022 оны  нэгдүгээр сарын 12-ны өдрийн 32 дугаар тогтоолоор Засгийн Газрын Хэрэгжүүлэгч Агентлаг Ашигт малтмал газрын тосны газрын даргаар томилогдон ажиллаж байгаа. Тэрбээр Уулын инженер, геологич мэргэжилтэй,  Боловсролын шинжлэх ухааны доктор цолтой, ОХУ-ын ГХДС, Япон Улсын Тохоку Их Сургуулийг төгссөн. Л.Баярмандал нь 1990-1998 онд Геологи Эрдэс Баялгийн Хүрээлэнд Эрдэм шинжилгээний ажилтан,  2005-2007 онд Япон Улсын Тохоку Их Сургуульд Ассистант багш, 2007-2011 онд Сүмитомо Корпорацид менежер,2011-2014 онд “Прайм Алянс” ХХК-д Гүйцэтгэх захирал, 2014 онд “УСУ Койл” ХХК-д гүйцэтгэх захирал, 2014-2016 онд Засгийн газрын хэрэгжүүлэгч агентлаг Газрын тосны газарт судлаач ажилтан, 2017 онд Геологийн судалгааны төвд судлаач ажилтан,  2017 онд “ЭТТ Майнинг” ХХК-д зөвлөх, 2017-2021 онд Ерөнхий сайдын Ажлын албанд орон тооны бус зөвлөхөөр ажиллаж байжээ.

АМГТГ-ЫН ДАРГА Л.БАЯРМАНДАЛ ДӨРВӨН ОРОН СУУЦ, 180 САЯ ТӨГРӨГИЙН ХАДГАЛАМЖТАЙ, ТӨРИЙН БАНКНЫ ХУВЬЦАА ЭЗЭМШИГЧ

     Харин тэрбээр хөрөнгө орлогоо ингэж мэдүүлжээ. АМГТГ-ын дарга Л.Баярмандал нь 559 сая төгрөгөөр үнэлэгдэх дөрвөн орон сууцтай, нэг авто гарааштай, 60 сая төгрөгийн үнэлгээтэй Lexus, RX 330 машинтай, эзэмших эрхтэй гурав, өмчлөх эрхтэй нэг газартай. Газрын үнэлгээ 50 сая төгрөг. Дотоодын хадгаламждаа 180 сая төгрөгтэй, 23 сая төгрөгийн үнэт эдлэлтэй, бусдаас 76 сая төгрөгийн авлагатай, Төрийн банканд 94 сая төгрөгийн зээлтэй. Эрдэнэс таван толгой ХК ХК, Төрийн банк ХК-ийн хувьцаа эзэмшигч гэж мэдүүлжээ.