-СУРАГЧДЫН АМРАЛТАД САНАА ЗОВОХ ЯАХ ВЭ, С.БЯМБАЦОГТ САЙД АА. ЗАМ ТЭЭВРИЙН САЛБАРТ ЧИНЬ ЮУ БОЛЖ БАЙНА ВЭ-

 Улстөрчдийн сонгууль хэдийнэ эхэлжээ. Гурван жил Улаанбаатарт шигдсэн гишүүд сонгогдсон тойрог руугаа гүйдэлтэй болчихсон аятай цас, шуургыг үл тоон давхилдаж байна. Зав, чөлөө л гарвал сумын Соёлын төвд дүүжлэгдэж, сонгогчидтойгоо уулзаж, санал сэтгэгдлийг нь сонсоод, чухам чих зөөлөнтэй болчихсон яваа. Үүний нэг нь Зам тээвэр, хөгжлийн сайд С.Бямбацогт.

  С.Бямбацогт сайдын тойргоо услах ажил тун бартаатай байгаа. Уулзалтынхаа зарыг сугалаатай гэж тараасан нь олон нийтийн бухимдлыг төрүүлсэн. Улаанбаатараас гарахад нь л энэ асуудлаар баалж эхэлсэн. Дараа нь, түүний уулзалтад оролцоод гарсан Ховд аймгийн Мянгад сумын малчин эрэгтэй осгож, нас барсан харамсалтай хэрэг гараад байна.

Тодруулбал, С.Бямбацогт сайд өнгөрсөн өдрүүдэд Ховд аймгийн иргэдтэй уулзах уулзалтыг зохион байгуулсан. Тэрбээр арваннэгдүгээр сарын 25-нд Мянгад сумын иргэдтэй уулзалт хийсэн бөгөөд түүний уулзалтад оролцсон 63 настай Н гэх малчин осгож, амиа алдсан юм. Тус сумын Баянхошуу багийн малчин Н нь арваннэгдүгээр сарын 25-ны 18:00 цагийн орчимд сумын Соёлын төвд уулзалтад оролцохоор гэрээсээ гарчээ. С.Бямбацогт сайдын уулзалтад оролцоод сураггүй болсон учир ар гэрийнхэн нь арваннэгдүгээр сарын 28-нд Онцгой байдлын газарт дуудлага өгсөн байна. Дуудлагын дагуу таймгийн Онцгой байдлын газрын Эрэн хайх, аврах ангийн алба хаагчид сумын Цагдаагийн хэсгийн хоёр алба хаагч, сумын мэргэжлийн ангийн 35 хүн, ар гэрийн 20 хүнтэй хамтран эрэн хайж, нэг хоногийн дараа цогцсыг нь сумын төвөөс 1.5 км-ийн зайд байлах газраас олсон гэх.

Талийгаач Н-ийн хүүтэй холбогдож, энэ талаар тодруулахад “Аав минь С.Бямбацогт сайдын уулзалтад оролцохоор хөдөө гэрээсээ сумын төвд ирсэн. Сумын Соёлын төвд уулзалтад оролцоод, 21:00 цагийн үед гарсан юм билээ. Тэгээд гэр рүүгээ буцах замдаа нас барсан харамсалтай зүйл болоод байна. Энэ талаар дэлгэрэнгүй мэдээлэл өгмөөргүй байна” гэсэн юм.

Харин энэ талаар С.Бямбацогт сайдаас тодруулахад “Ховд аймгийн Мянгад сумын Баянхошуу багийн нутаг дэвсгэрт манай аав, 63 настай С.Нямдорж нь арваннэгдүгээр сарын 25-ны 22:00 цагт Энхбат гэх айлаас  гараад одоо болтол ирээгүй байна" гэх дуудлага 2023 оны арваннэгдүгээр сарын 28-ны 00:30 цагт ирсэн юм билээ.  Мэдээллийн дагуу С.Нямдоржийг тус сумын ЗДТГ-ын 45 ажилтан, ОБГ-ын зургаа, цагдаагийн зургаан алба хаагч, 13 тээврийн хэрэгсэлтэй тус сумын Цагаанбулан, Гахайт, Баянхошуу баг, Буянт сумын Нарийн гол багийн нутаг дэвсгэрт эрэн хайх ажлыг зохион байгуулсан гэсэн. Мянгад сумын уулзалтад 500 гаруй хүн оролцсон. Олон хүн дунд хэн, хэн ирснийг яаж мэдэх билээ дээ” гэх тайлбарыг өгсөн юм.

С.Бямбацогт сайд уг асуудлыг тоож байгаа ч шинж алга. Харин сонгуулийнхаа, тойргийнхоо иргэдэд таалагдах ажлыг сурагчдыг амралтаар үргэлжлүүлж байна. Тэрбээр сурагчдын амралтыг мал төллөх үеэр болгох саналыг Б.Энх-Амгалан сайдад хүргүүлжээ.

        Тодруулбал, тэрбээр цахим хуудастаа “Орон нутгийн сурагчдын өвлийн амралтыг мал төллөх үетэй уялдуулан зохицуулах талаар Боловрол, шинжлэх ухааны сайдад хандлаа. Өнгөрсөн сард тойрогтоо ажиллаж, иргэд, малчдаа сонссон. Уулзалтын үеэр ихэнх сумын малчид маань сурагчдын өвлийн урт амралтыг мал төллөх үеэр тааруулж өгөх хүсэлт тавьсан. Хаврын хахир хүнд цаг, мал төллөлтийн үеэр уламжлалт бэлчээрийн мал аж ахуйн онцлогоос хамааран малчдын ажил эрс нэмэгддэг. Энэ их ажлын үеэр малчдад үр, хүүхдүүдээс нь өөр дэм тус авах хүн, хүч  байдаггүй билээ. Иймд  хөдөө, орон нутгийн сурагчид эцэг, эхдээ туслах, уламжлалт ахуй соёлоо өвлөх  боломжийг нь бүрдүүлж, сурагчдын өвлийн урт амралтыг мал төллөх үеэр тааруулж өгөх хүсэлтийг нэр бүхий гишүүдийнхээ хамтаар салбарын сайдад уламжиллаа” хэмээн бичжээ.

Ташрамд дурдахад, С.Бямбацогт сайдын уг саналыг УИХ-ын гишүүн Б.Бат-Эрдэнэ, Б.Баярсайхан, Б.Бейсен, С.Ганбаатар, Г.Дамдинням, Б.Дэлгэрсайхан, Г.Тэмүүлэн, Ч.Хүрэлбаатар, Ц.Цэрэнпунцаг, Т.Энхтүвшин нар дэмжиж, хамт саналаа хүргүүлжээ.

Сурагчдын амралтад өөрчлөлт оруулахад санаа зовох яах вэ, С.Бямбацогт сайд аа. Удирдаж байгаа салбарт чинь урагштай ажил харагдахгүй л байна шүү.