Хөхөө өвлийн хүйтэнд шатахуун хайгаад хонон, өнжин дугаарлаж байгаа монголчууд дэндүү хөөрхийлөлтэй байна даа. Салбар хариуцсан сайд Ж.Ганбаатар “Эдийн засаг, хөгжлийн сайд Ч.Хүрэлбаатар бид хоёр Оросуудтай хамт телеграмын хаяг нээж, групп чатанд орсон” хэмээн их ажил гүйцэтгэж байгаа аятай ярьж байхад ч монголчууд шатахуундаа дугаарлаж байна.

Ж. Ганбаатар сайдын хувьд Оросуудтай хамт групп чатанд байгаа нь дээд “амжилт” бололтой. Тэр бараг групп чат нээсэнд нь, өөрөө багтсандаа итгэж чадахгүй баярлаж, бардаж байх шиг байна. “Шатахууны чинь асуудлыг зохицуулж байгаа, битгий банкаа дүүргээд бай” гэх маягийн тайлбар өгөв.

        Тэрбээр өнөөдөр шатахууны нийлүүлэлт, хангамжийн талаар мэдээлэл өгөхдөө “Шатахууны асуудлаар Монгол, ОХУ-ын Засгийн газар хоорондын комиссын Оросын хэсгийн дарга, сайд А.А.Козловоор ахлуулсан телеграм групп хаягийг нээж, арваннэгдүгээр сараас хойш ажиллуулж байна. Энэ групп чатанд ОХУ-ын салбар хариуцсан бүх сайд байгаа. Харин Монголын талаас Эдийн засаг, хөгжлийн сайд Ч.Хүрэлбаатар болон миний бие тус групп чатанд байгаа. Ч.Хүрэлбаатар сайдыг энэ групп чатад яагаад байгаа юм бол гэж гайхах байх. Ч.Хүрэлбаатар сайд Монгол, ОХУ-ын Засгийн газар хоорондын комиссын Монголын хэсгийн дарга нь шүү дээ” гэсэн юм.

Монголын талаас хоёр ч сайд ОХУ-ын сайдуутай хамт групп чат нээгээд шатахууны асуудал цэгцрэхгүй бололтой. Өнгөрсөн арваннэгдүгээр сард нээсэн групп чатны ашиг одоо ч гараагүй, харин ч эсэргээрээ шатахуунгүй болчихоод, “гал алдах”-д хүрээд байна.

       Үүнийг Ж.Ганбаатар сайд “Монголчууд банк банкаар нь шатахуунаа дүүргээд, хомстуулаад байна” гэж тайлбарлаж, иргэд рүү бурууг чихлээ. Тодруулбал, тэрбээр өнөөдөр мэдээлэл хийх үеэрээрээ “Монгол Улсад шатахууны нөөц гэж байхгүй. Нөөцөлж авдаггүй гэсэн үг. Ийм учраас иргэдийг дугаарлаж, банк банкаар нь шатахуун нөөцөлж авахгүй байхыг хүсье. Иргэд дугаарлахгүй, банкаа дүүргэхгүй, хэвийн авч эхэлбэл маргааш, нөгөөдрөөс АИ-92 шатахууны түгээлт хэвийн болно. Шатахууны нийлүүлэлт тасалдахгүй ирж байгаа. Иргэдээс хүлцэл өчиж байна. Манай дотоодын хэрэглээ маш өндөр байна. Цаашид АИ92 болон дизель түлшийн үнэ нэмэгдэхгүй. Шатахууны тал дээр Оросын талаас том анхаарал тавьж байгаа. 2022 оны нэгдүгээр сарын 1-нээс 2022 оны арванхоёрдугаар сарын 31-нийг хүртэл 987.875 тонн дизиль түлш импортолсон байна. Энэ оны эхний арван нэгэн сарын байдлаар 1.235.735 тонн түлш импортолсон байна. Харин АИ92 түлшний хувьд 2022 оны нэгдүгээр сарын нэгнээс он дуустал 626.395 тонн түлш импортолсон байна. Харин 2023 оны эхний арван нэгэн сарын байдлаар 636.719 тонн түлш импортолж байсан байна. Бид найм, есдүгээр сард шатахуунаа сайн нөөцөлсөн. Харин есдүгээр сарын 21-нд гарсан хориг тавьж, 21 хоногийн хугацаанд манай улсад огт шатахуун орж ирээгүйн улмаас энэ нөөц бүрэн барагдсан. Дизиль түлшийн тухайд ОХУ-ын нийлүүлэлт өгдгөөрөө өгнө, илүү өгч чадахгүй байгаа. Үүнийг шийдвэрлэхийн тулд БНХАУ-аас 31.500 тонн дизиль түлш захиалсан. Эхний 5000 тонн нь өнөөдөр урдаас ирж байгаа. Мөн дизиль түлшийг шатахуун түгээх станцуудаар хямд зарахаас гадна цааш дамнаж шаглах процесс гарч байгаа учир Улаанбаатар хотоос ямар нэгэн захиалгагүйгээр дизиль түлш гаргахыг хориглож байна. Нийлүүлэлтээ нэмэгдүүлнэ. Мөн зарим компани түгээхгүйгээр, бөөний худалдаа маягаар зарж байгаа тохиолдол ч байна. Бусад улс энэ үүсэж байгаа асуудлыг хамтаараа даван туулж байгаа. Өнөөдөр дэлхийн зах зээл дээр дизиль түлш ихээр унаж байгаа. Дизиль түлшний үнэ энэ оны арваннэгдүгээр сард тонн нь 930 доллар байсан. Харин арванхоёрдугаар сард 850 доллар болсон.  БНХАУ-аас 1080 долллараар авч байгаа. АИ92 шатахууны хувьд сүүлийн гурван хоног асуудал гарсан ч өнөөдөр маргаашдаа сайжирчих байх гэсэн хүлээлт байна. Өнөөдрийн байдлаар 18 тонн АИ-92 шатахуун ирж байна” гэсэн юм.

Ж.Ганбаатар сайд аа, улсын ажил гэдэг чихэр худалдахаас ч хариуцлагатай ажил шүү. Тэр дундаа шатахууны асуудалд шат дараалалттай анхаарлаа хандуулж, арга хэмжээ авах хэрэгтэй байна. Түүнээс групп чатанд орсноо олзуурхаж, олон ажил амжуулж байгаа мэтээр авирлах нь зүйд нийцэхгүй л болов уу. Ч.Хүрэлбаатар сайдтай сайн ярилц, ойлголц, групп чатандаа саналаа хэл, хэл нэвтрэлцэхгүй бол бусдаас тусламж авна уу. Таныг хүлээсээр монголчууд хөлдөх нь.